შსს-ს ინფორმაციით, ჩოხატაურში საკრებულოს ყოფილ თავმჯდომარესთან ერთად პოლიციელზე ჯგუფური თავდასხმისთვის 2 ძებნილი დააკავეს.
“შინაგან საქმეთა სამინისტროს თანამშრომლებმა, პოლიციელზე განხორციელებული ჯგუფური ძალადობის ბრალდებით, 2006 წელს დაბადებული ლ.ჩ. და 1997 წელს დაბადებული დ.ს. დააკავეს.
გამოძიებით დადგინდა, რომ მიმდინარე წლის 27 იანვარს, ოზურგეთში მდებარე ერთ-ერთ რესტორანში, ურთიერთშელაპარაკების ნიადაგზე, ბრალდებულებმა ჯგუფურად იძალადეს პოლიციელზე.
პოლიციამ ჯგუფურ ძალადობაში მონაწილე ჩოხატაურის საკრებულოს თავმჯდომარე დავით შარაშიძე, მომხდარიდან მალევე – ცხელ კვალზე დააკავა, ხოლო დანაშაულში მონაწილე კიდევ ორი პირი შემთხვევის ადგილიდან მიიმალნენ.
სამართალდამცველებმა სისხლის სამართლის საქმეზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად ლ.ჩ. და დ.ს. 31 იანვარს თბილისში ბრალდებულის სახით დააკავეს.
გამოძიება საქართველოს სისხლის სამართლის კოდექსის 126-ე მუხლის პირველი ნაწილის პრიმა მუხლის “ბ” ქვეპუნქტით მიმდინარეობს.” – წერს უწყება
გუშინ პოლიციელზე ჯგუფურ ძალადობაში ბრალდებულ ჩოხატაურის საკრებულოს ყოფილ თავმჯდომარეს, დავით შარაშიძეს, 30 000-ლარიანი საპატიმრო გირაო შეუფარდა. 28 იანვარს შსს-მ გაავრცელა ინფორმაცია, რომ პოლიციელზე ჯგუფური ძალადობის ბრალდებით ჩოხატაურის საკრებულოს თავმჯდომარე, დავით შარაშიძე დააკავეს. დღეს დაკავებულ პირებზე კი ძებნა იყო გამოცხადებული. ადგილობრივი ჟურნალისტის, ლადო მენაბდის ინფორმაციით, სუფრაზე, სადაც დაპირისპირება მოხდა, ირაკლი კობახიძის მამა, გიორგი კობახიძე, “ოცნების” დეპუტატი ვასილ ჩიგოგიძე, ე.წ კანონიერი ქურდი, ჩოხატაურის საკრებულოს ყოფილი თავმჯდომარე ირაკლი კუჭავა და პოლიციელი გოგა ჯინჭარაძე იმყოფებოდნენ. ჟურნალისტის ინფორმაციით, შარაშიძემ მის წინამორბედს, ირაკლი კუჭავას, პოლიციელის თანდასწრებით შეაგინა და ჩხუბიც ამას მოჰყვა. გუშინ ცნობილი გახდა, რომ საქმის ფარგლებში ჩატარებული საგამოძიებო მოქმედებების შედეგად, ჩოხატაურის ყოფილი გამგებელი და მოქმედი მერის მოადგილის, ბიძინა ცინცაძის მამა გია ცინცაძე დააკავეს. გავრცელებული ინფორმაციით, მისი სახლიდან იარაღი ამოიღეს.