უკვე საათზე მეტია ტექნიკურ უნივერსიტეტში ფაკულტეტების საბჭოს სხდომები მიმდინარეობას. სწორედ აქ უნდა შეაჯერონ საბოლოო პოზიციები დაა ამ პოზიციებით უნდა მივიდნენ პროფესორ მასწავლებლები – უნივერსიტეტის რექტორთან.
სოციალურ მეცნიერებათა და ბიზნეს ტექნოლოგიების ფაკულტეტების შეხვედრა უკვე დასრულდა. პროფესორები ამბობენ, რომ მათ ერთხმად განაცხადეს, რამდენად საზიანოა ტექნიკური უნივერსიტეტისთვის ის გადაწყვეტილება, რომელიც გუშინ გამოცხადდა.
მათი თქმით, მოგვიანებით, რექტორთანაც დაამტკიცებენ საკუთარ პოზიციას იმასთან დაკავშირებით, რომ თუ გადაწყვეტილება არ შეიცვლება, ეს იქნება არ ამხოლოდ დამანგრეველი ამ ორი უნივერსიტეტის სტუდენტებისთვის, არამედ მძიმე ზეგავლენას მოახდენს ქართული განათლების სისტემაზე.
არ მეგონა, ჩემ ცხოვრებაში თუ დადგებოდა ეს მომენტი, რომ ჩვენი ფაკულტეტის საბჭო შეიკრიბებოდა იმ მიზნით, რა მიზნითაც დღეს შეიკრიბა. ჩვენმა ფაკულტეტმა დაუჭირა მხარი ერთხმად იმას, რომ ეს პროცესი არ მოხდეს. ჩვენ ტექნიკურ უნივერისტეტს არავის დავუთმობთ. ჩვენ აზრიც არ გვკითხონ, არაფრად ჩაგვაგდონ, ეს წარმოუდგენელი რამეა – ამბობს სოციალურ მეცნიერებათა ფაკულტეტის დეკანის მოადგილე, თამარ ხოხობაშვილი.
შეხვედრების პარალელურად ტექნიკურ უნივერსიტეთან პროფესორ-მასწავლებლები და სტუდენტები არიან შეკრებილები.
ცნობისთვის, “ქართულმა ოცნების“ ხელისუფლებამ თბილისის სახელმწიფო და ტექნიკური უნივერსიტეტების გაერთიანების გადაწყვეტილება მიიღო. ამის შესახებ „ქართული ოცნების“ განათლების მინისტრმა, გივი მიქანაძემ ბრიფინგზე განაცხადა.
აღნიშნულ გადაწყვეტილებას პროტესტი მოჰყვა როგორც სტუდენტებში, ისევე აკადემიურ საზოგადოებაში. გუშინ ქუჩაში გამოვიდნენ როგორც სტუ-ს ისე თსუ-ს სტუდენტები, ლექტორები და დეკანები.
აკადემიური პერსონალი ამბობს, რომ “ოცნების” გადაწყვეტილებით ორი უნივერსიტეტის საუკუნოვანი ისტორია დასრულდება.