ცვლილებები განათლების სფეროში – ტექნიკური უნივერსიტეტის რექტორი, დავით გურგენიძე პროფესორ მასწავლებლებს შეხვდება, სადაც მოუწევს უპასუხოს კითხვებს, რატომ გახდა საჭირო ორი უნივერსიტეტის გაერთიანება.
აქცია გაიმართება შეხვედრის პარალელურად სტუ-ს შენობის წინაც. მეხუთე კორპუსის წინ სტუდენტები შეიკრიბებიან და ეცდებიან, საკუთარი ხმა რექტორს ქუჩიდანაც გააგონონ.
რას ემსახურება 2 უნივერსიტეტის გაერთიანება – განათლების ექსპერტები მიიჩნევენ, რომ უპირველეს ყოვლისა, “ქართული ოცნება“ დიდ თანხებს დაზოგავს განათლებაზე და ეცდება, მაქსიმალურად შეკვეცოს პროფესორებისა და სტუდენტების რაოდენობა.
გარდა ამისა, ისინი ეჭვობენ, რომ ივანიშვილის გუნდი დაინტერესებულია ისტორიული შენობებით და ქალაქის ცენტრში არსებული კორპუსებით, რომლებსაც, სავარაუდოდ, საკუთარი ინტერესებისთვის გამოიყენებს.
ეს არის პოლიტიკური გადაწყვეტილება, რაც თავისთავად პრობლემურია, რომ პოლიტიკოსები იღებენ გადაწყვეტილებას და არა უნივერსიტეტები თავიანთი ავტონომიურობის ფარგლებში. მეორე მნიშვნელოვანი საკითხი,რ აც ცალსახად დგება, ეს არის ისტორიული იდენტობის დაკარგვის მნიშვნელოვანი პრობლემა, რომელიც ცალსახად დადგება, – ამბობს შალვა ტაბატაძე.
ექსპერტების თქმით, საჭიროა გაირკვეს, რა დამატებით სარგებელს მოუტანს ეს გაერთიანება სტუდენტებს და პროფესორებს და რა მიზანს ემსახურება.
რა დამატებით სარგებელს მოუტანს ეს სტუნდეტებს, პროფესორებს, უნდა აგვიხსნან და გვითხრან, თუ საბოლოო ჯამში ისევ იმ მიზანს არ ემსახურება, რომ შენობები გამოთავისუფლდეს და შემდეგ გაიყიდოს ცენტრალურ უბნებში,- ამბობს ექსპერტი.
“ქართულმა ოცნების“ ხელისუფლებამ თბილისის სახელმწიფო და ტექნიკური უნივერსიტეტების გაერთიანების გადაწყვეტილება მიიღო. ამის შესახებ „ქართული ოცნების“ განათლების მინისტრმა, გივი მიქანაძემ ბრიფინგზე განაცხადა.