შეერთებულ შტატებში მასშტაბური დიდთოვლობისა და ძლიერი ყინვის გამო დაღუპულთა რიცხვი 18-მდე გაიზარდა. ამის შესახებ ინფორმაციას გამოცემა Reuters-ი ავრცელებს.
ზამთრის შტორმის გამო აღმოსავლეთ შეერთებული შტატების დიდი ნაწილი პარალიზებულია. გამოცემა წერს, რომ ჩრდილო-აღმოსავლეთით ნიუ-იორკიდან და მასაჩუსეტსიდან სამხრეთით ტეხასამდე და ჩრდილოეთ კაროლინამდე გზები ყინულით და ზოგან 30 სანტიმეტრზე მეტი თოვლის საფარითაა დაფარული.
25 შტატის გუბერნატორმა ამინდის გაუარესების გამო საგანგებო მდგომარეობა გამოაცხადა.
შტორმმა საჰაერო მოძრაობა შეაფერხა, კვირას აშშ-ში 12 500-ზე მეტი რეისი გაუქმდა, ხოლო ორშაბათს 3 900.
აშშ-ის ტრანსპორტის მინისტრის შონ დაფის განცხადებით, ის იმედოვნებს, რომ აეროპორტები ოთხშაბათისთვის “ჩვეულ რეჟიმში დაბრუნდება”.