“ნიკორამ” გამოაცხადა კონკურსი. ეძებს ძალოვნებთან ურთიერთობის სპეციალისტს – ამის შესახებ პოლიტიკოსი რომან გოცირიძე სოციალურ ქსელში წერს.
“ნიკორამ” გამოაცხადა კონკურსი. ეძებს ძალოვნებთან ურთიერთობის სპეციალისტს. ტრაგიკომიკური შემთხვევაა. მაინც არა უშავს, ჯერ არაა მთლად ტრაგიკული, მაგრამ მალე დაუდგება ბიზნესს ეს დღე. ამიტომ ვურჩევ ყველას, ცოტა წინ გაიხედონ და იფიქრონ ისეთი სპეციალისტების მოძებნაზე, რომლებსაც შეუძლიათ მავნებლობის, საბოტაჟის, ძირგამომთხრელი საქმიანობისა და საწარმოებში საერთაშორისო ჯაშუშობის საკითხებზე მუშაობა.
რადგან “ნიკორამ” წამოიწყო ეს საქმე, ვთავაზობ ჩემს კანდიდატურას: ზედმიწევნით შესწავლილი მაქვს საბჭოთა კავშირში და სხვა მსგავს ქვეყნებში ბიზნესზე და მოქალაქეებზე რეპრესიების საკითხები, ვიცნობ საარქივო ნაბეჭდ თუ ვიზუალურ მასალებას. ჩემდა გასაკვირად, რატომღაც ახლა მომინდა უკრაინელი მაგარი რეჟისორის, სერგეი ლოზნიცას დოკუმენტური ფილიმის ნახვა 1937 წლის რეპრესიების შესახებ. დივერსიების მოწყობისა და უცხო ქვეყნის( დღეს რომ დიპ სტეიტს ეძახიან) სასარგებლოდ ჯაშუშობის გამო გაანადგურეს საბჭოთა ინდუსტრიული ელიტა. ძალიან გრძელი ფილმია, მხოლოდ ძველი საბჭოთა საარქივო მასალებზე აგებული. ყველა მეწარმეს ვურჩევ ნახოს. ერთ რამეს უნდა მიაქციონ ყურადღება-რაც უფრო მკაცრად დასჯიან, მით უფრო აღფრთოვანებული იქნება ხალხი.
ქვემოთ “ნიკორას” ვუგზავნი მათ მიერ გამოქვეყნებული განცხადების დანართს შევსებული სახით. ხელფასზე ცალკე მექნება საუბარი.
2024 წლის მონაცემებით “ნიკორას” საწარმოებისა და სავაჭრო ქსელის ბრუნვა 1.45 მილიარდი ლარი იყო. 2023 წელს მოგება 62 მილიონი ლარი ჰქონდა, 2024 წელს 33 მილიონი. რადგან მოგება მერყევია, არ ვითხოვ ფიქსირებულ ხელფასს, იყოს მიგებიდან პროცენტი.🤓
p.s. ნიკორას არაფერს ვერჩი. აქ რომ ამ საბჭოთა მავნებლებზეა საუბარი, ყველა მიხვდება”