მოკლული მასწავლებლის, გიგა ავალიანის საქმეზე დაკავებული ერთ-ერთი არასრულწლოვნის, ა.ნ.-ს დედა პოლიციას ჩვენებას არ აძლევს – ამის შესახებ მისმა ადვოკატმა TV პირველთან განაცხადა. ადვოკატის თქმით, ქალი დუმილის უფლებას იყენებს:
“ა.ნ.-ს ოჯახის წევრი იყენებს მისთვის კანონით მინიჭებულ დუმილის უფლებას, მას კანონი აძლევს ამის უფლებას, რომ მისი ნათესავის წინააღმდეგ არ მისცეს ჩვენება. შესაბამისად, როგორც ჩემთვისაც ცნობილია, მან აღნიშნული უფლება გამოიყენა… გუშინ საღამოს არასრულწლოვან ა.ნ.-ს საცხოვრებელ ბინაში ჩატარდა ჩხრეკა. ასევე ჩატარდა ა.ნ.-ს დედის პირადი ჩხრეკა მოსამართლის განჩინების საფუძველზე. ამას ვესწრებოდით ჩვენ, როგორც ოჯახის ადვოკატები. ჩხრეკის შედეგად ამოღებულია ელექტრონული ინფორმაციის მატარებელი წყაროები.
ჩემი დაცვის ქვეშ მყოფის ა.ნ.-ს პოზიცია ბრალთან დაკავშირებით არის მტკიცე და ურყევი. პასუხი არის ერთადერთი – ის თავს ცნობს სრულიად უდანაშაულოდ წარდგენილ ბრალში და იგი ფიქრობს, რომ წარდგენილი ბრალი არის უკანონო და დაუსაბუთებელი. ვერანაირი მტკიცებულება ვერ იქნება მოპოვებული ობიექტურ პირობებში,რომელიც მიუთითებს ა.ნ.-ს რაიმე ბრალეულობას” – აცხადებს ადვოკატი TV პირველთან.