უკრაინამ საქართველოდან ელჩი გაიწვია. ამის შესახებ უკრაინის პრეზიდენტმა ვოლოდიმირ ზელენსკიმ გამართულ პრესკონფერენციაზე განაცხადა. აღნიშნულ გადაწყვეტილებას მწერალი ირაკლი კაკაბაძე სოციალურ ქსელში ეხმაურება და ირაკლი ღარიბაშვილის გადადგომას ითხოვს.
“სასწრაფოდ უნდა გადადგეს ღარიბაშვილი. და უნდა გვყავდეს ისეთი პრემიერი, რომელიც ახლა უკრაინას გამოუცხადებს სოლიდარობას. ღარიბაშვილი თბილისში უკანონო მშენებლობებს “კრიშავს” და სრულიად იდიოტურ განცხადებებს აკეთებს. ღარიბაშვილს ზალკალიანიც სჯობია და ბევრი სხვაც – ამხელა ვირია ეს სულელი. ენას რომ კბილი დააჭიროს – ეგეც არ იცის”, – წერს კაკაბაძე “ფეისბუქი”- ს პირად გვერდზე.
ცნობისთვის, უკრაინის პრეზიდენტის განცხადებით, საქართველოდან უკრაინის ელჩის გაწვევა ხდება იმის გამო, რომ ქართულმა მხარემ ხელი შეუშალა ქართველი მოხალისეების უკრაინაში გამგზავრებას, ხოლო სანქციების დაკისრების საკითხზე ჰქონდა „ამორალური პოზიცია“.
“რაც შეეხება ჩვენს დიპლომატებს, მათი ქმედებები გამართლებულია იმ სახელმწიფოების მიმართ, რომელებმაც თავიანთი სიტყვა და საერთაშორისო ნორმები დაარღვიეს. დაუყონებლივ კონსულტაციებზე გამოვიწვიეთ უკრაინის ელჩი ყირგიზეთიდან, რადგან ამ ქვეყანამ რუსული აგრესია გაამართლა. ასევე ვიძახებთ კონსულტაციებზე უკრაინის ელჩს საქართველოდან, რადგან მოხალისეები არ გამოუშვეს, ასევე სანქციებთან დაკავშირებით ამორალური პოზიციის გამო”, – განაცხადა ზელენსკიმ.