დიდი ბრიტანეთის პრინცი ჰარი და სასექსის ჰერცოგინია მეგან მარკლი უკრაინაში მიმდინარე საომარ ვითარებას სოციალურ ქსელში ეხმაურებიან და უკრაინელ ხალხს სოლიდარობას უცხადებენ.
“ჩვენ უკრაინელი ხალხის გვერდით ვდგავართ“, – წერია მეგან მარკლისა და პრინცი ჰარის ოფიციალურ ვებ-გვერდზე.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის კიევის დაბომბვით დაიწყო. მანამდე დაახლოებით 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა.
აგრესორის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის აღება.
ომის გამოცხადებამდე უკრაინის პრეზიდენტმა, ვოლოდიმირ ზელენსკიმ პუტინთან დაკავშირება სცადა, თუმცა, მისივე ცნობით, პასუხად მხოლოდ სიჩუმე მიიღო.
რუსეთის სამხედრო ძალები უკრაინას სხვადასხვა მიმართულებით უტევენ.
უკრაინის ხელისუფლების ინფორმაციით, რუსეთის თავდასხმის პირველ დღეს, 24 თებერვალს 137 ადამიანი დაიღუპა. უკრაინამ საომარი მდგომარეობა და საყოველთაო მობილიზაცია გამოაცხადა და რუსეთთან დიპლომატიური ურთიერთობები გაწყვიტა. გამოცხადებულია კომენდანტის საათი.
უკრაინაზე თავდასხმის გამო ევროკავშირმა, აშშ-მა, დიდმა ბრიტანეთმა და სხვა ქვეყნებმა რუსეთის საბანკო, ენერგეტიკის და ავიაციის სფეროებს ახალი სანქციები დაუწესეს.
https://mix.metronome.ge/26182-2/