სამართლებრივი დავა კალაძის წინააღმდეგ – სასამართლო მერიიდან გათავისუფლებული პირის სარჩელს განიხილავს.
გიგა სოფრომაძე უწყებას პოლიტიკური ნიშნით დევნაში ადანაშაულებს და ამტკიცებს, რომ დედაქალაქის მერიიდან სადაც 8 წლის განმავლობაში მუშაობდა, პროევროპული აქციების მხარდაჭერის გამო გამოუშვეს.
პირველი პროცესი მერიის წინააღმდეგ სასამართლოში უკვე დაწყებულია. დღეს დაცვის მხარე აპირებს, რომ საქმეზე დამატებითი მტკიცებულებების დართვის შუამდგომლობა დააყენოს.
ადვოკატის თქმით, სასამართლო არსებითად ან იმსჯელებს იმ მტკიცებულებების გარეშე, რაც დაცვის მხარისთვის თვისობრივად მნიშვნელოვანია ან მათ მიერ მოთხოვნილ დოკუმენტაციას დაურთავს.
თავად სოფრომაძე კი დარღვევებზე საუბრობს – ამბობს, რომ პირველი სხდომის ერთი წლის შემდეგ ჩანიშვნა, ცალსახად უკვე დარღვევის ფაქტებზე მიანიშნებს.
“დღეს დაიწყო საქალაქო სასამართლოში ჩემი სარჩელის განხილვა, რომელიც უკავშირდება თბილისის მერიიდან ჩემს გათავისუფლებას. მთელი ეს პროცესები მიმდინარეობდა პროცესუალური დარღვევით. პირველი სხდომა ჩაინიშნა ერთი წლის შემდეგ, რაც ცალსახად უკვე მიანიშნებს დარღვევის ფაქტებზე. ჩემი გათავისუფლება უკავშირდებოდა ცალსახად ჩემს მიერ საჯარო გაზიარებულ პოზიციას, რომ მე ვრჩები საზოგადოების ერთგული, ქართველი ხალხის ერთგული – იმ საქმის და იმ კონსტიტუციის ერთგული, რომელსაც საქართველო მიჰყავს დასავლური ცივილური საზოგადოებისაკენ. წინასწარი განცდა რაც არის პროცესებთან დაკავშირებით, არ მიანიშნებს იმას, რომ სასამართლო აპირებს სამართლიან მსჯელობას, თუმცა მაინც ველოდები სხდომის დასრულებას და უფრო მეტს ამის შემდეგ ვისაუბრებ”, – განაცხადა სოფრომაძემ.