თბილისის ბიუჯეტი 17 მილიონი ლარით გაიზრდება. შესაბამის გადაწყვეტილებას საკრებულოს სხდომაზე უკვე დაუჭირეს მხარი.
დამატებითი თანხის დახარჯვას დედაქალაქის მერია გეგმავს სკოლების რემონტზე, მოსწავლეთა ტრანსპორტირებაზე, გზების მშენებლობასა და სკვერების მოწყობაზე.
თუმცა, მიუხედავად იმისა, რომ ქალაქში სოციალური მდგომარეობა მძიმეა და ათასობით მოქალაქე სიღარიბეში ცხოვრობს, მიღებულ გადაწყვეტილებაში არ არის დაკონკრეტებული, გაიზრდება თუ არა დაფინანსება შეჭირვებული და სოციალურად დაუცველი ადამიანების მხარდასაჭერად.
ამ გადაწყვეტილებას კრიტიკულად აფასებს ოპოზიცია. მათი განცხადებით, ბიუჯეტის გაზრდის მიუხედავად, თბილისის ფინანსურ გეგმაში არ აისახა არც ერთი ოპოზიციური ინიციატივა, მათ შორის განათლების მიმართულებით წარდგენილი წინადადებები.
ოპოზიციის წარმომადგენლები ხაზგასმით მიუთითებენ, რომ დამატებითი 17 მილიონი ლარის განაწილება არ პასუხობს სისტემურ პრობლემებს, განსაკუთრებით კი სასკოლო ინფრასტრუქტურის საკითხს, სადაც პასუხისმგებლობები ერთმანეთშია არეული და პროცესს ერთდროულად რამდენიმე უწყება მართავს.
საუბარია 17 მლნ ლარის დამატებაზე თბილისის ბიუჯეტში და ამჯერად თბილისის ბიუჯეტი შეადგენს 2 მლრდ 210 მლნ ლარს. აქ არ აის გათვალისწინებული ოპოზიციის არცერთი ინიციატივა, მათ შორის, ჩვენი ინიციატივა, რომელიც უკავშრდებოდა განათლების მიმართულებას და ეს ცვლილება სწორედ განათლების მიმათულებით არის. უკავშირდება ძირითადში სკოლებში ინფრასტრუქტურული სამუშაოების წარმოებას. პრობლემა არის სახეზე, რადგან ახლა, რეალურად, სასკოლო ინფრასტრუქტურით დაინტერესებულია სამი ინსტიტუცია. ერთის მხრივ, განათლების სამინისტრო, მეორეს მხრივ, ინფრასტრუქტურის სამინისტრო, მესამეს მხრივ – თბილისის მერია. ეს მეტყველებს იმაზე, რომ ვერ აგვარეენ ამ პრობლემას, – ამბობს ოპოზიციის წარმომადგენელი.