ჟურნალისტი ვახო სანაია, საგარეო საქმეთა მინისტრის მხრიდან უკრაინის მხარდამჭერ განცხადებას სოციალურ ქსელში ეხმაურება:
“ზალკალიანს ნორმალური განცხადება ჰქონდა უკრაინაზე. ასევე დაგმო სახელმწიფო სათათბიროს მიმართვა პუტინისადმი, აღიაროს ლუგანსკისა და დონეცკის ოლქები დამოუკიდებელ სახელმწიფოებად.დაიმახსოვრეთ ჩემი სიტყვა – არ აპატიებენ და მოხსნიან მალე. ისედაც უპირებენ გადაყენებას”, – სანაია “ფეისბუქი”- ს პირად გვერდზე.
ცნობისთვის, საგარეო საქმეთა მინისტრმა დავით ზალკალიანმა უკრაინის ერთობის დღისადმი მიძღვნილ ღონისძიებაზე სიტყვით გამოსვლისას განაცხადა, რომ 2008 წელს საქართველომ საკუთარ თავზე გამოსცადა რუსული აგრესია, რასაც მოჰყვა ქვეყნის განუყოფელი ნაწილების აღიარება და მისი ტერიტორიების 20%-ის ოკუპაცია, ხოლო, ასობით ათასი ადამიანი დევნილად იქცა საკუთარ სახელმწიფოში.
„დღეს იმავე განსაცდელშია ჩვენი მოძმე უკრაინა. შემაშფოთებელია რუსეთის დუმის მიერ მიღებული გადაწყვეტილება დონეცკისა და ლუგანსკის აღიარებასთან დაკავშირებით. საქართველო გმობს ამ ქმედებას“, – განაცხადა სიტყვით გამოსვლისას საქართველოს პირველმა დიპლომატმა.
ამასთან, საგარეო უწყების ხელმძღვანელის თქმით, ყოველივე ზემოაღნიშნული წარმოადგენს საფრთხეს არა მხოლოდ საქართველოსა და უკრაინისთვის, არამედ მთლიანი ევროპული არქიტექტურისთვის.
„არავის აქვს უფლება, აუკრძალოს თავისუფალ ქვეყნებს თავად აირჩიონ საკუთარი განვითარების გზა, მეგობრები და ალიანსები. ჩვენ დარწმუნებული ვართ, რომ მოძმე უკრაინელ ხალხთან ერთად გავაგრძელებთ სვლას ჩვენი ისტორიული, დამსახურებული არჩევანის მისაღწევად“,- აღნიშნა საქართველოს ვიცე-პრემიერმა.
საგარეო საქმეთა მინისტრის თქმით, აღნიშნული დღე უნდა იყოს არა მხოლოდ უკრაინის, არამედ პროგრესული საზოგადოების ერთობის დღე.