საქართველოს პრეზიდენტი, სალომე ზურაბიშვილი თამაზ მეჭიაურის გარდაცვალების გამო მწუხარებას გამოთქვამს.
“ღირსეული ქართველი და რაც ესოდენ იშვიათია ღირსეული პოლიტიკოსი, თავის ქვეყნის ერთგული შვილი… მთიანეთს დააკლდებით და სრულიად საქართველოს”, – წერს ზურაბიშვილი “ფეისბუქი”-ს პირად გვერდზე.
თიანეთის ყოფილი მერი და ყოფილი დეპუტატი, თამაზ მეჭიაური 67 წლის ასაკში, დღეს დილით გარდაიცვალა.
თამაზ მეჭიაურს რამდენიმე კვირის წინ კორონავირუსი დაუდასტურდა.
საუნივერსიტეტო კლინიკის კლინიკური დირექტორის ლალი ტურძილაძის ცნობით, თამაზ მეჭიაურს სუნთქვის მწვავე უკმარისობა აღენიშნებოდა
თამაზ მეჭიაური 1954 წლის პირველ დეკემბერს სოფელ ჟებოტაში დაიბადა. დაამთავრა თბილისის კომაროვის სახელობის ფიზიკა-მათემატიკური სკოლა-ინტერნატი, შემდეგ თბილისის სახელმწიფო უნივერსიტეტის საინჟინრო-ეკონომიკური ფაკულტეტი.
2012–2016 წლებში იყო საქართველოს მე-8 მოწვევის პარლამენტის წევრი, საფინანსო-საბიუჯეტო კომიტეტის თავმჯდომარე. 2016 წელს დააფუძნა პარტია „ერთიანი საქართველოსთვის“. 2017 წელს აირჩიეს თიანეთის მუნიციპალიტეტის მერად. 2020 წელს საპარლამენტო არჩევნებში მონაწილეობის მიზეზით თანამდებობიდან გადადგა.