კარინა გრიგორიანი, რომელიც მძიმე სენს ებრძოდა, გარდაიცვალა. სამწუხარო ინფორმაციას პარლამენტის ყოფილი წევრი ირინა სარიშვილი სოციალურ ქსელში ეხმაურება:
“სხვაზე ვერაფერზე ვერ ვფიქრობ. ადრე დაპირისპირებულები პატარა ქეითის განსაცდელმა დაგვამეგობრა. მართლა დაგვამეგობრა და არა ისე, “ფეისბუკურად”. ერთი წელი თითქმის ყოველდღე და ყოველ საღამოს ერთად ვიყავით აქ, ინბოქსში და თუკი რამეზე შეიძლება ლაპარაკი, ყველაფერზე ვლაპარაკობდით, ვჭორაობდით, ვიცინოდით.
არც თვითონ იმჩნევდა და არც მე არაფერს. ერთი რაც მითხრა – ქეითის დატოვება არ მინდა და მაგიტომ ვიბრძვი სიცოცხლისთვისო. ბოლო საუბარიც ტრადიციულად სიცილით დავასრულეთ. მერე მიწერილზე აღარ მიპასუხა და მივხვდი, რომ უკვე ძალიან ცუდადაა. რომ წავიდა, ინბოქსი გავხსენი არ ვიცი რატომ და ელდა მეცა – გული დაუსვია ჩემ მინაწერზე რამდენიმე დღის წინ, მეტი ვერ შეძლო. ასე დამიტოვა გული კარინამ და ჩემი გულის ნაწილი წაიღო.
უზომოდ მიყვარდა და მისგანაც იგივეს ვგრძნობდი. მიუხედავად ყველაფრისა, მაინც მქონდა იმედი, რომ გადავრჩებოდით. ალბათ, იმიტომ რომ ასეთი მასშტაბის უსამართლობის წარმოდგენა არ შემეძლო. ქეითი იყო შენი დარდი, კარინა და არ გაიყოლო დარდი თან. შენ ისეთი სიყვარული დატოვე და ისეთი კარგი მამიკო ჰყავს ქეითს, ყველაფერი კარგად ექნება – ყველა მის გვერდით ვართ. ვერ ვწერ რასაც ვგრძნობ, უბრალოდ, გული რომ არ გამხეთქვოდა, ეს მაინც დავწერე”, – წერს სარიშვილი “ფეისბუქი”-ს პირად გვერდზე.
არსებული ინფორმაციით, კარინა გრიგორიანის შვილი ქეითი უკვე მეორე წელია რაც ლეიკემიას ებრძვის, რომელსაც იტალიაში ძვლის ტვინი გადაუნერგეს. კარინა გრიგორიანი შვილის დონორი უნდა ყოფილიყო, მაგრამ რამდენიმე დღით ადრე შეუძლოდ გახდა და შვილის სამკურნალოდ უცხო ქვეყანაში ჩასულ ქალს მელანომის მეოთხე სტადია დაუდგინდა.
ქეითს ძვლის ტვინი მამამ გადაუნერგა. ამჟამად, გოგონა რეაბილიტაციის პერიოდს გადის.
თავად კარინა გრიგორიანმა კი ბინადრობის არ ქონის გამო, მკურნალობის კურსი ვერ გაიარა.