“მომივიდა ხმები რომ დავწერო შეწყალება და გავიდე გარეთ ბოდიში მაგრამ სისულელეა! ჯერ მოძალადე მეძახეს მერე ქვეყნის დამქცევი მერე მოღალატე” – მათე დევიძე

“ჩემი ბრძოლა იქნება ბოლომდე, უკანასკნელ ამოსუნთქვამდე და მას მერეც”- თქვა მათე დევიძემ სასამართლო პროცესზე.
„მადლობა, რომ მოხვედით. ძალიან მიყვარხართ ყველა და მეიმედებით. ბოლომდე, ისევ და ისევ.
მომივიდა ხმები, რომ დავწერო შეწყალება და გავიდე გარეთ. ბოდიში, მაგრამ სისულელეა! ჯერ მოძალადე მეძახეს, მერე ქვეყნის დამქცევი, მერე მოღალატე.
მაპატიეთ, მაგრამ ნებისმიერი შემოთავაზებული შეღავათი იქნება უარყოფილი, მაპატიეთ ამ სიტყვაზე და მიფურთხებული ჩემგან.
არ ვიცი, რანაირად გადმოვცე, მაგრამ ქვეყანაში არის კორუფციის ისეთი ქსელები, ნემსი ვერ ჩავარდება და მე ვზივარ ციხეში.
არაფერი არ დამთავრებულა. ხალხი სცემეს, დაასახიჩრეს, ყველანაირი ურთიერთობა თუ წინსვლის საფუძველი წყალს გაატანეს. რთულია ამასთან ჭიდილი, როცა არაფერი გიჭირავს ხელში, რაც გაგიმაგრებს ზურგს, გარდა ხალხისა, რომელიც, როგორც მე, შიშველი ხელებით იბრძვის. სიბინძურე ტრიალებს ქვეყანაში.
დავამთავრებ მე ახლა. ჩემი ბრძოლა იქნება ბოლომდე, უკანასკნელ ამოსუნთქვამდე და მას მერეც.
მე თქვენი იმედი არ მაქვს [მიმართავს მოსამართლეს]. ისეთი მარაზმია, ტყუილი და აბსურდი მიმდინარე საქმეები სასამართლოში, რომ სამართლიანი გადაწყვეტილების იმედი არ მაქვს. ჩემი იმედი მკვდარია.
მოსამართლე: რა იცით, რა გადაწყვეტილებას ვიღებ?
მათე: არ მჯერა სამართლიანი გადაწყვეტილების.
მეგობრებო, ალბათ დიდი ხანი ვეღარ გნახავთ. მიყვარხართ და დროებით.“- თქვა სასამართლოზე პროევროპულ აქციაზე დაკავებულმა მათე დევიძემ
სააპელაციო მათე დევიძის საქმეზე საქალაქო სასამართლოს გადაწყვეტილება, რომლის მიხედვითაც მას 4 წლითა და 6 თვით პატიმრობა აქვს მისჯილი, ძალაში დატოვა. გადაწყვეტილება სააპელაციო სასამართლოში რამდენიმე წუთის წინ მოსამართლე ნინო ჩახნაშვილმა გამოაცხადა. მათე დევიძემ სააპელაციო სასამართლოში მიმდინარე სხდომა, გადაწყვეტილების გამოცხადებამდე დატოვა