“არც საქართველოს და არც ისრაელის სპეცსამსახურებს არანაირი ინფორმაცია საქართველოში მოსალოდნელი ტერორისტული თავდასხმების საფრთხის შესახებ არ ჰქონიათ” – წერს სახელმწიფო უსაფრთხოების სამსახური და ისრაელის მედიაში შესაძლო ტერორისტული აქტის შესახებ გავრცელდა ინფორმაცია ეხმაურება.
უწყების თქმით, მსგავსი ინფორმაცია არ ყოფილა მიწოდებული ისრაელის წარმომადგენლებისთვის.
“არც საქართველოს და არც ისრაელის სპეცსამსახურებს არანაირი ინფორმაცია საქართველოში მოსალოდნელი ტერორისტული თავდასხმების საფრთხის შესახებ არ ჰქონიათ და შესაბამისად, არც არავისთვის გაუზიარებიათ.
ჩვენ კავშირზე ვართ ისრაელის სპეცსამსახურის წარმომადგენლებთან, რომლებმაც გაკვირვება გამოთქვეს გავრცელებული არასწორი ინფორმაციის გამო.
ძალიან სამწუხარო და ნიშანდობლივია, რომ ასეთი ინფორმაცია ქართული მედიის ნაწილის მიერ ჩვენთან გადამოწმების გარეშე ვრცელდება.
კატეგორიულად მოვუწოდებთ ყველას, თავი შეიკავონ საქართველოსთვის დამაზიანებელი და გადაუმოწმებელი ინფორმაციის გავრცელებისგან.” – სახელმწიფო უსაფრთხოების სამსახური.
შეგახსენებთ, ისრაელის მედიაში გავრცელდა ინფორმაცია, რომ პოტენციური ტერორისტული თავდასხმის საფრთხის გამო კნესეთის წევრები საქართველოში დაგეგმილ კონფერენციაში მონაწილეობას არ მიიღებენ.