ოკუპირებულ სოხუმში პირველად გაამხილეს პროექტის მიზანი, რომელიც ორ წელზე მეტი ხნის განმავლობაში სპეკულაციის საგანი იყო – “ეხო კავკაზას” ცნობით, ტრანზიტული და ლოჯისტიკის კომპანიის აღმასრულებელმა დირექტორმა და “აფხაზეთში მსოფლიოს ხალხთა ასამბლეის ხელმძღვანელმა”, ასტამურ ახსალბამ აღიარა, რომ ინფორმაცია რთული გეოპოლიტიკური ვითარების გამო, განზრახ იყო დამალული – „ახლომახლო ომი მიმდინარეობს და მთელი დასავლეთი რუსეთის ფედერაციას უპირისპირდება“ – თქვა ახსალბამ. საუბარია მდინარე ენგურზე ახალი “საბაჟო ტერმინალის” მშენებლობაზე.
ახსალბამ ადგილობრივ გამოცემასთან აღნიშნა, რომ მშენებლობა თითქმის დასრულებულია და ოკუპირებული სოხუმი ტვირთების ტრანზიტის დასაწყებად „ჰიპოთეტურად მზად არის“.
“2012-2014 წლებამდე არსებული გეოპოლიტიკური სიტუაციის გამო, ეს პროექტი ვერ განხორციელდა საქართველოში არსებულ ვითარებასთან და ყოფილი პრეზიდენტ სააკაშვილის ადმინისტრაციასთან დაკავშირებული ობიექტური მიზეზების გამო“ – ამბობს ახსალბა.
ახსალბის თქმით, უკრაინაში სრულმასშტაბიანი ომის შემდეგ, პროექტი მისი “სტრატეგიული პარტნიორისთვის, რუსეთისთვის, სასიცოცხლოდ მნიშვნელოვანი“ გახდა. მისმა კომპანიამ პროექტის გალის რაიონში განხორციელება შესთავაზა.
“ახსალბა პოტენციურ სატრანზიტო სქემას შემდეგნაირად აღწერს: ძირითადი ტვირთი იქნება სამომხმარებლო საქონელი, როგორიცაა საყოფაცხოვრებო ტექნიკა, ბოსტნეული და ა.შ. თუ ტვირთი ირანიდან მოდის, ირანული სატვირთო მანქანა მძღოლით შეძლებს აფხაზეთში შესვლას, ოჩამჩირის რაიონში გადასვლას, რკინიგზის ტერმინალში გადმოტვირთვას და რეგიონის დატოვებას. საჭიროების შემთხვევაში, მანქანას შეუძლია უსაფრთხოების კონტროლის ქვეშ გააგრძელოს მოძრაობა აფხაზეთში.
დერეფნის პოტენციურ მომხმარებლებს შორის დასახელებულია ირანი, ინდოეთი და აზერბაიჯანი – ქვეყნები, რომლებიც დაინტერესებულნი არიან რუსეთის სამხრეთ რეგიონებში: დონის როსტოვი, კრასნოდარი და სოჭი, უმოკლესი გზით” – წერს გამოცემა.
ამ თემაზე დასმული კითხვის პასუხად, კობახიძემ დღეს თქვა, რომ საქართველო რუსეთის მიმართულებით ტვირთებს არ გაატარებს: „გიდასტურებთ, რომ არ გავატარებთ.“