რუსეთის გენერალური პროკურატურა აცხადებს, რომ “ნაციონალური მოძრაობის” წევრს, გიორგი ბარამიძეს ე.წ. დონეცკის სახალხო რესპუბლიკაში დაუსწრებლად გაასამართლებენ.
მას 2022 წელს უკრაინაში რუსეთის წინააღმდეგ ბრძოლის გამო გაასამართლებენ.
“დონეცკის სახალხო რესპუბლიკის პროკურატურამ დაამტკიცა ბრალდების დასკვნა საქართველოს 57 წლის მოქალაქის, გიორგი ბარამიძის წინააღმდეგ აღძრულ სისხლის სამართლის საქმეზე. მას დაუსწრებლად ედება ბრალი რუსეთის ფედერაციის სისხლის სამართლის კოდექსის 359-ე მუხლის მე-3 ნაწილით (დაქირავებულის მონაწილეობა შეიარაღებულ კონფლიქტში)”, – წერია განცხადებაში.
რუსეთის პროკურატურის მტკიცებთ, 2022 წლის თებერვალში ბარამიძე უკრაინის ტერიტორიაზე დაქირავებული მებრძოლის სახით ჩავიდა და შეუერთდა ქართულ ეროვნულ ლეგიონს.
განცხადების მიხედვით, მან ადგილზე გაიარა სამხედრო მომზადება, “რომელიც მიზნად ისახავდა საბრძოლო იარაღის მოხმარების უნარების მიღებას, შეიარაღებულ კონფლიქტში მონაწილეობისთვის აუცილებელი სტრატეგიის, ტაქტიკისა და ბრძოლის მეთოდების შესწავლას.” ხოლო 2022 წლის აპრილამდე, ის მონაწილეობდა რუსეთის ფედერაციის შეიარაღებული ძალების სამხედრო მოსამსახურეების წინააღმდეგ ბრძოლებში.
რუსეთის პროკურატურა ასევე წერს, რომ ბარამიძის მიერ მიღებულმა ანაზღაურებამ 238 000 რუბლს გადააჭარბა.
“ბარამიძე საერთაშორისო ძებნილად არის გამოცხადებული, მას სასამართლომ დაუსწრებლად შეუფარდა აღკვეთის ღონისძიების სახით პატიმრობა”, – წერია განცხადებაში.