“ლელო- ძლიერი საქართველოს” ერთ-ერთი ლიდერი ალეკო ელისაშვილი სასამართლოს შენობაში შეჭრის ბრალდებით გუშინ დააკავეს. ადვოკატის ინფორმაციით, ელისაშვილს ბრალს დღეს წარუდგენენ.
“დღეს ველოდებით ჩვენ ბრალის დადგენილების ჩაბარებას და ხვალ უკვე სასამართლოს, სადა სასამართლო იმსჯელებს აღკვეთთან დაკავშირებით. არ ვიცით ბრალდების დადგენილების ჩაბარების შემდგომ იქ რა მუხლები იქნება მითითებული”- განაცხადა გიორგი რეხვიაშვილმა.
შეგახსენებთ, კოალიცია „ძლიერი საქართველო-ლელოს” ერთ-ერთი ლიდერი, ალექსანდრე ელისაშვილი გუშინ დააკავეს. შინაგან საქმეთა სამინისტროს ცნობით, ელისაშვილმა გუშინ დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა.
„გამოძიებით დგინდება, რომ მიმდინარე წლის 29 ნოემბერს, გამთენიისას, ალექსანდრე ელისაშვილმა, შენიღბულმა, ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა. მას შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს“,- აღნიშნავენ უწყებაში.