“ჩვენთვის ალეკო ელისაშვილის დღევანდელი ქმედება მიუღებელი და გაუმართლებელია” – ამის შესახებ პარტია “ძლიერი საქართველო – ლელო” განცხადებას ავრცელებს, რომლითაც პარტიის ერთ-ერთი ლიდერის ალეკო ელისაშვილის დაკავებას ეხმაურებიან.
“ჩვენთვის ალეკო ელისაშვილის დღევანდელი ქმედება მიუღებელი და გაუმართლებელია.
ალეკო ელისაშვილი არაერთხელ გამხდარა რეჟიმის მხრიდან უსამართლობისა და ძალადობის მსხვერპლი და მისი აღიარება დასტურია, რომ ეს არის რეჟიმის წინააღმდეგ ერთი ადამიანის თავგანწირული ქმედება.
რეჟიმს არ უნდა მივცეთ საშუალება, რომ სისტემური ძალადობითა და უსამართლობით სასოწარკვეთილებამდე მიგვიყვანოს და უარი გვათქმევინოს ტირანიასთან ბრძოლის მშვიდობიან და კანონიერ გზებზე, რაც იყო და იქნება „ძლიერი საქართველო- ლელოს“ ამოსავალი პრინციპი” | წერს ძლიერი საქართველო – ლელო სოციალურ ქსელში.
შეგახსენებთ, დღეს შსს-მ ალეკო ელისაშვილი დააკავა. უწყების მტკიცებით, პოლიტიკოსმა თბილისის საქალაქო სასამართლოს კანცელარიის დაწვა სცადა. მოგვიანებით ელისაშვილის ადვოკატმა განაცხადა, რომ ეს ქმედება იყო მისი პროტესტი უსამართლო სასამართლოს წინააღმდეგ.