“საქართველოს დაშორება ევროკავშირთან და ევროპულ ღირებულებებთან დაჩქარებული ტემპით მიმდინარეობს. ქართული ოცნება მეტად იკეტება საკუთარ თავში და შორდება მოსახლეობის ნებას” – ამის შესახებ “ქართული ოცნების” ყოფილი საგარეო საქმეთა მინისტრი პაპუნა ჯანელიძე სოციალურ ქსელში წერს.
მისი თქმით, საქართველოს დაშორება ევროპასთან ძალიან სწრაფად მიმდინარეობს და ხელისუფლება სრულიად აიგნორებს იმ პროტესტს, რომელსაც ეს ფაქტი იწვევს მოსახლეობაში.
“ერთი წლის წინ, საზოგადოების დიდმა ნაწილმა გამოხატა მტკიცე პროტესტი ქართული ოცნების მიერ გამოცხადებულ გადაწყვეტილებასთან დაკავშირებით. სამწუხაროდ, ეს საკმარისი არ აღმოჩნდა პროცესის შესაჩერებლად. საქართველოს დაშორება ევროკავშირთან და ევროპულ ღირებულებებთან დაჩქარებული ტემპით მიმდინარეობს. ქართული ოცნება მეტად იკეტება საკუთარ თავში და შორდება მოსახლეობის ნებას.
დღეს, საპროტესტო განწყობა საზოგადოებაში კიდევ უფრო მაღალია, ვიდრე იყო ერთი წლის წინ. დიდ წილად, ეს იმ ხალხის შედეგია, ვინც განუწყვეტლად აპროტესტებს არსებულ რეალობას.
მინდა გამოვხატო დიდი პატივისცემა და სოლიდარობა ყველა პოლიტპატიმრისადმი, და ასევე, იმ მოქალაქისადმი, რომელიც არ ეგუება რეჟიმს.” – წერს “ქართული ოცნების” ოცნების ყოფილი საგარეო საქმეთა მინისტრი, პაპუნა ჯანელიძე სოციალურ ქსელში.