“არ ვაპირებ სასამართლო პროცესებზე სიარულს, რადგან არ ვაღიარებ წაყენებულ ბრალს და ამ მასკარადში მონაწილეობას არ მივიღებ!”- ამის შესახებ სოციალურ ქსელში მოკლული მასწავლებლის, გიგა ავალიანის დედა წერს.
“სასამართლო პროცესის შესახებ გვეკითხება უამრავი ადამიანი.
ამიტომ, აქ გიპასუხებთ ყველას.
უპირველესად, უდიდესი მადლობა თანადგომისთვის. იცოდეთ, თქვენ ნამდვილად ღირსეულ ახალგაზრდას უჭერთ მხარს და ამით იცავთ კიდეც თქვენი შვილების უსაფრთხო მომავალს.
რამდენიმე წუთის წინ დამთავრდა წინა სასამართლო განხილვა.
არ ვაპირებ სასამართლო პროცესებზე სიარულს, რადგან არ ვაღიარებ წაყენებულ ბრალს და ამ მასკარადში მონაწილეობას არ მივიღებ! თუმცაღა, როცა მე დამიბარებს მოსამართლე, იმ სხდომაზე აუცილებლად მივალ, შეგატყობინებთ ყველას და თქვენი თანადგომის განუსაზღვრელად დიდი იმედი მაქვს.
რაც შეეხება დღევანდელ სხდომას:
1) მკვლელების მხარემ გირაოს სახით 1 0000-1 0000 ლარად მოითხოვა მკვლელთა თავისუფლება! (რაც არ დააკმაყოფილა სასამართლომ)
2) ყველა მტკიცებულება დატოვეს სადავო.
3) საქმის გამოძიება გრძელდება.” – წერს ეკა კუპატაძე.
შეგახსენებთ, ახალგაზრდა მასწავლებელი, გიგა ავალიანი, რომელსაც 1 ოქტომბერს სახლთან ჩაუსაფრდნენ და სცემეს, 25 ოქტომბერს კლინიკაში გარდაიცვალა. 26 წლის გიგა ავალიანს თავის არეში უმძიმესი დაზიანებები მიაყენეს, მას ორი ოპერაცია ჩაუტარდა, თუმცა ექიმებმა მისი გადარჩენა ვერ შეძლეს.
მოკლული მასწავლებლის ოჯახის წევრები და ნათესავების მთავარი მოთხოვნაა, საქმე გადაკვალიფიცირდეს, ვინაიდან თვლიან, რომ ესაა ჯგუფურად ჩადენილი დანაშაული, ხოლო დედის თქმით, ექსპერტიზის პასუხში ყველაფერი არაა აღწერილი.