ლევან ჯანგველაძის შეკვეთილი მკვლელობის საქმე – ცალკე წარმოებად მიმდინარე საქმეზე ბრალდებული ხუთივე პირი, ძმები – დავით და გიორგი მიქაძეები, გიორგი ჯოხაძე, გიორგი კაჭკაჭაშვილი და მამუკა ბაღდავაძე მოსამართლე ნანა შამათავამ პატიმრობაში დატოვა.
არცერთი ბრალდებული დანაშაულს არ აღიარებს. სხდომას დღეს გიორგი კაჭკაჭაშვილი და მამუკა ბაღდავაძე ესწრებოდნენ, გიორგი ჯოხაძე და დავით მიქაძე ძებნაში იმყოფებიან, გიორგი მიქაძემ კი სასამართლო პროცესს ბოიკოტი გამოუცხადა
ბრალდების მხარე ხუთივე პირის მიმართ შეფარდებული აღკვეთი ღონისძიების, პატიმრობის ძალაში დატოვებას ითხოვდა.
რაც შეეხება დაცვის მხარის შუამდგომლობებს, ძმები მიქაძეების ადვოკატებმა სასამართლოს 100 000 ლარის ოდენობით გირაოს შუამდგომლობით მიმართეს.
50 000 ლარის ოდენობის გირაოს შუამდგომლობა დააყენა სხდომაზე გიორგი ჯოხაძის ადვოკატმა. გიორგი კაჭკაშაშვილის ადვოკატმა 20 000-ის, ხოლო მამუკა ბაღდავაძის ადვოკატმა 50 000 ლარის.
მოსამართლე ნანა შამათავამ არცერთი ადვოკატის შუამდგომლობა არ დააკმაყოფილა და ხუთივე პირის აღკვეთი ღონისძიება ძალაში დატოვა.
ლევან ჯანგველაძის შეკვეთით და ანგარებით განზრახ მკვლელობის ორგანიზების, ჯგუფურად ცეცხლსასროლი იარაღის მართლსაწინააღმდეგოდ შეძენა-შენახვა-გასაღების, განსაკუთრებით მძიმე დანაშაულის დაფარვისა და მართლმსაჯულებისთვის ხელის შეშლის მიზნით ცრუ ინფორმაციის მიწოდების ბრალდებით 3 პირი – გიორგი მიქაძე, მამუკა ბაღდავაძე, გიორგი კაჭკაჭაშვილი დააკავეს. გიორგი ჯოხაძისა და დავით მიქაძის მიმართ კი ძებნა არის გამოცხადებული.