ბიჭიკო პაიკიძის ადვოკატის, ირმა ჭკადუას თქმით, პაიკიძეს პასპორტი გაუუქმეს, ამიტომ ვერ ბრუნდება საქართველოში. ამის შესახებ მან დღევანდელ სასამართლო სხდომაზე ისაუბრა. ინფორმაციას ინტერპრესნიუსი ავრცელებს.
“ბრალდების მხარემ ყველაფერი გააკეთა იმისთვის, რომ ბიჭიკო პაიკიძე საქართველოში არ დაბრუნებულიყო, მას პასპორტი გაუუქმეს…
მან ერთ-ერთ ქვეყანაში პასპორტი დაკარგა, ის საქართველოში იუსტიციის სახლს ელექტრონულად დაუკავშირდა, რათა ახალი პასპორტი აეღო, მან კანონით დადგენილი ყველა გზა გაიარა, როცა აღნიშნული პასპორტი მასთან მის მეუღლეს მიჰქონდა, ის საზღვარზე არ გაუშვეს და ეს პასპორტი ბატონი ბექა ხუნაშვილის [პროკურორი] წერილით გაუქმებულია. ნებისმიერი ქვეყანა ვალდებულია მის მოქალაქეზე იზრუნოს, რა ტიპის დამნაშავეც არ უნდა იყოს ის. ეს არის უპრეცედენტო შემთხვევა, როცა ადამიანს საფრთხის ქვეშ აყენებენ. დიახ, ბრალდებას არ სურს ის აქ იყოს და ყველა კითხვას პასუხი გასცეს.” – თქვა ირმა ჭკადუამ, IPN-ის ცნობით.
ცნობისთვის, ამ წუთებში თბილისის საქალაქო სასამართლოში, ბიჭიკო პაიკიძისა და მასთან ერთად ბრალდებული კიდევ 5 პირის სასამართლო პროცესი მიმდინარეობს. სხდომას პაიკიძე არ ესწრება, ვინაიდან ის საქართველოში არ იმყოფება და მის მიმართ საერთაშორისო ძებნაა გამოცხადებული. სასამართლომ დღეს იმსჯელა, გაგრძელებულიყო თუ არა ბრალდებულის მონაწილეობის გარეშე მისი სასამართლო პროცესი.