მამა შალვა კეკელია MIX-მეტრონომთან დეკანოზ პეტრე კვარაცხელიას იმ ბოლოდროინდელ განცხადებებს ეხმაურება, სადაც ის სასულიერო პირების სოციალურ პრობლებზე ამახვილებს ყურადღებას.
როგორც მამა შალვა კეკელიამ აღნიშნა, მღვდლის პირიდან წუწუნი მიუღებელია.
“როგორც ერი ცხოვრობს, ასევე ცხოვრობენ სასულიერო პირებიც. როგორც მაღალი წრის წარმომადგენლები, ისე დაბალი წრის წარმომადგენლები არიან. ბუნებრივია, ეს აისახება მათზეც, ადამიანებზე. რა ფონიც არის სახელწმიფოში, რა პრობლემებიც არის ქვეყანაში, ანალოგიურად სასულიერო პირებზეც აისახება. არაფრით განსხვავდებიან. მარტო სასულიერო პირები კი არა, ხალხიც უკიდურეს გაჭირვებაში, ძალიან მძიმე მდგომარეობაშია. ძალიან ბევრ ადამიანს, საჭმელი არ აქვს, სასმელი არ აქვს.
თუნდაც, ეს თანხა, 25 მილიონი, რომელიც საპატრიარქოში ირიცხება, ეკლესია ქველმოქმედებას ახმარს, ეს თანხა იხარჯება ისევ – სკოლებში, ბაღებში, უპატრონო ბავშვთა სახლებში და მოხუცთა თავშესაფრებში.
“სასულიერო პირები შიმშილობენ” – ასე საკითხის დასმა არ შეიძლება. როგორც საზოგადოების დიდ ნაწილს უჭირს, ისევე გვიჭირს ჩვენც, მაგრამ პირადად არ მიწუწუნია, მეც გამივლია გაჭირვება, მეც არ მქონია დენის გადახდის საშუალება, მაგრამ სოციალურ ქსელში არასდროს დამიწერია, იცი რა, დენის, გაზის ფულს ვერ ვიხდი და ხალხო დამეხმარეთ-მეთქი. მე რომ მღვდელი ვხდებოდი ვიცოდი, რასაც ღმერთი მომცემდა, იმას უნდა დავჯერებოდი. ჩემს ცხოვრებაში არასდროს მიწუწუნია. მითუმეტეს, როდესაც სასულიერო პირები ამდენი ადამიანის გაჭირვებას ვხედავთ.
მღვდლებს იმხელა გაჭირვებასა და ტკვილთან გვაქვს შეხება, ზოგს შვილი უკვდება, უამრავ ოჯახში მივდივართ და ამის შემდეგ მღვდელმა იწუწუნოს, მიუღებელია და საერთოდ არ მესმის. იმდენ მძიმე თემებს ვეხებით, ჩვენი მხრიდან ამაზე ლაპარაკი და წუწუნი წარმოუდგენელი რამ არის.
სოციალურ პრობლემებზე ათასჯერ გვისაუბრია და ახლაც ვსაუბრობთ, მაგრამ სასულიერო პირმა დაიწყოს იმაზე ლაპარაკი, რომ გადასახედებს ვერ იხდის, მშიერია, მღვდლის პირიდან ეს მიუღებელია. ასეთ რამეზე მღვდელმა პირველ პირში ისაუბროს, ეს წარმოუდგენელია.
ჩემთვის ყველანაირი წუწუნი, მითუმეტეს, სასულიერო პირისგან არის მიუღებელი. სასულიერო პირი, რომელიც ყოველდღე ამდენ გაჭირვებას, ტკივილს ეხები, ადამიანების გარდაცვალებას, მათ შორის, ახალგაზრდების… მღვდელმა როგორ უნდა დაიწუწუნო?! – მოდიან ადამიანები, გვიყვებიან თავიანთი შვილის პრობლემებზე, ზოგს აზარტული თამაშების გამო სახლი რომ გაუყიდეს, სტრესში არიან და ა.შ… და ამ დროს წუწუნი… ჩემთვის გაუგებარია”, – ამბობს მამა შალვა კეკელია MIX – მეტრონომთან საუბარში.