მან რაკეტების გამოცდის ნაცვლად ომი უნდა დაასრულოს – დონალდ ტრამპი ვლადიმერ პუტინზე

მან რაკეტების გამოცდის ნაცვლად ომი უნდა დაასრულოს – ამის შესახებ ამერიკის შეერთებული შტატების პრეზიდენტმა, დონალდ ტრამპმა განაცხადა.

მისი თქმით, რუსეთის პრეზიდენტ ვლადიმერ პუტინის მიერ ბირთვული ძრავით აღჭურვილი ფრთოსანი რაკეტის გამოცდის შესახებ განცხადება „შეუსაბამო“ იყო.

„მან ომი უნდა დაასრულოს. ომი, რომელიც ერთი კვირა უნდა გაგრძელებულიყო, მალე მეოთხე წელს უახლოვდება. სწორედ ეს უნდა გააკეთოს მან რაკეტების გამოცდის ნაცვლად“, – განუცხადა ტრამპმა ჟურნალისტებს Air Force One-ის ბორტზე, როდესაც უპასუხა შეკითხვას, იყო თუ არა რუსეთის მიერ რაკეტის გამოცდა „იარაღის ჟღარუნი“.

შეგახსენებთ, ვლადიმერ პუტინმა გუშინ განაცხადა, რომ რუსეთმა წარმატებით გამოსცადა „ბურევესტნიკის“ რაკეტა, რომელსაც, მისი თქმით, მოქმედების შეუზღუდავი რადიუსი აქვს.