“ჩემის აზრით, თუ სააკაშვილი დეპრესიაშია, ამის მთავარი მიზეზი არა მის მიმართ განხორციელებული პოლიტიკური მართლმსაჯულება, ან ციხეში ჯდომა, არამედ დაშვებული ფატალური შეცდომის გაცნობიერებაა”, – ამის შესახებ პოლიტოლოგი გია ხუხაშვილი სოციალურ ქსელში წერს.
“მან დაინახა, როგორ ააგდეს გოიმივით, ჩამოიყვანეს და თუ ვინმემ ისარგებლა და დღემდე სარგებლობს მისი ჩამოსვლით, დაპატიმრებით, ეს ხელისუფლებაა.
ეს მისთვის, როგორც პოლიტიკოსისთვის უაღრესად მტკივნეულია.
ზუსტად იგივე დაემართა ბადრის. მას ის კი არ აწუხებდა, რომ მის მიმართ დევნა ხორციელდებოდა სახელმწიფო გადატრიალების მუხლით, არამედ ის, თუ ‘გოიმივით’ როგორ წამოიკიდა მიშამ. ბადრი ბავშვურ შეცდომაზე დარდმა გადაიყოლა.
ამიტომ და არა იმიტომ, რომ ვინმე მას მოკვლას უპირებს, მგონია, რომ სააკაშვილის სიცოცხლესაც რეალური საფრთხე ემუქრება…
ყველაზე ეფექტური მკვლელი საკუთარი გამოუსწორებელი შეცდომაა…”, – წერს ხუხაშვილი “ფეისბუქის” პირად გვერდზე.
პოლიტოლოგის აღნიშნულმა შეფასებამ, მიხეილ სააკაშვილის ადვოკატის, “მთავარი არხის” გენერალური დირექტორის ნიკა გვარამიას გაღიზიანება გამოიწვია და ამავე პოსტის კომენტარებში დაწერა:
“გია, ბოლო პერიოდში, თუ ვინმეს აქვს ღრმა დეპრესიის და ფატალური პესიმიზმის ნიშნები, მგონი შენ ხარ პირველ რიგში”, – მიმართა გვარამიამ ხუხაშვილს.
პოლიტიკის ანალიტიკოსის მოსაზრებას ჟურნალისტი ნანუკა ჟორჟოლიანიც პასუხობს:
“ბატონო გია, წარმოგიდგენიათ რა ხდება 50 დღიანი შიმშილობის შემდეგ, განსაკუთრებით მაშინ როცა ადეკვატური მკურნალობით არ ხდება მდგომარეობიდან გამოყვანა? იქნებ დაგუგლოთ რას იწვევს ეს პროცესი?! გოიმივით გადაგდებაა რაც გახარიამ ქნა. პოლიტიკაში რომ შემოვიდა, მეორედ მოსვლა დაანონსა და მეზობლებიც კი რომ ვერ პოულობენ!”, – წერს ჟორჟოლიანი Fecebook- პოსტის კომენტარებში.