სოციალური სამართლიანობის ცენტრის (SJC) იურისტი თამთა მიქელაძე წერს, რომ თბილისში მცხოვრებ აზერბაიჯანელ ჟურნალისტს აფგან სადიგოვს ამ დრომდე ვერ უკავშირდებიან.
აფგან სადიგოვი რუსთაველის გამზირზე მიმდინარე პროტესტის აქტიური მონაწილეა.
თამთა მიქელაძე წერს, რომ ბოლო კომუნიკაციის დროს აფგან სადიგოვმა ცოლს უთხრა, რომ რუსთაველზე მიდიოდა.
“აფგან სადიგოვთან კონტაქტი გაწყდა დღეს საღამოს და ამ დრომდე ვერ ვუკავშირდებით.
კამერა, რომელიც მის სახლთან დავამონტაჟეთ, მაღალი ალბათობით გამორთული აღმოჩნდა იმ რამდენიმე წუთის განმავლობაში, რომელიც ემთხვევა მისი ბოლო კომუნიკაციის დროს მეუღლესთან, სადაც მან უთხრა, რომ რუსთაველზე მიდიოდა.
რუსთაველზე აფგან სადიგოვი, მაღალი ალბათობით, ვერ წავიდა, რადგან მისი თანხმლები პირი, ვისთან ერთადაც მეტროთი რუსთაველზე მიდიოდა ხოლმე, ამბობს, რომ დანიშნულ დროს აფგანი მასთან არ მივიდა. გამორთული კამერა მისი გასვლის ეპიზოდს არ აჩვენებს.
სახლის კარები ახლაც დაკეტილია და ვცდილობთ სიტუაციაში გარკვევას. გამოვიძახეთ პოლიციაც.
იმედი მაქვს, რომ აფგან მუხთარლის სცენარი არ ვითარდება ახლა და მისი გატაცების სპეცოპერაციაც არ დაიგეგმა”, – წერს თამთა მიქელაძე.