უღალატა თუ არა ყოფილმა პრემიერმინისტრმა “ოცნებას”? – აღნიშნულ კითხვაზე ივანიშვილის გუნდის წევრები გადაჭრით პასუხს ვერ ამბობენ. 2 წლის წინ კი ალბათ მათგან ვერავინ წარმოიდგენდა, რომ გავიდოდა დრო და ირაკლი ღარიბაშვილის ერთგულების ეჭქვეშ დაყენება მოუწევდათ.
სუს-ი და მესამე დღეა არ ამბობენ გამოკითხეს თუ არა ირაკლი ღარიბაშვილი და გრიგოლ ლილუაშვილი. ხმაურიანი ჩხრეკების შედეგად ამოღებული მილიონობით დოლარის, ოქროს ზოდებისა და ძვირფასი საათების დემონსტრაციული ჩვენებით კორუფციაზე მიგვანიშნეს, თუმცა მეტი აღარაფერი გვითხრეს. იმას, რასაც ჯერ სუს-ი არ ამბობს, სახელისუფლებო მედია მიანიშნებს. პროპაგანდა ღარიბაშვილ-ლილუაშვილს სრული რესურსით აშავებს.
ამ დროისთვის, ირაკლი ღარიბაშვილი, სავარაუდოდ მოსაშვილის 10 ნომერში ელოდება, რა განაჩენს გამოუტანენ მას კობახიძე-მდინარაძე. ექს-პრემიერის სახლთან ახლა მისი ავტოპარკის მხოლოდ ნაწილია შემორჩენილი.