სალომე ზურაბიშვილი სოციალური ქსელით განცხადებას ავრცელებს და ოცნების ახალ საკანონმდებლო ინიციატივებს ეხმაურება.
“ტერორი საქართველოში ახალ სიმაღლეებს აღწევს!
მმართველი პარტია წარადგენს კანონპროექტს, რომელიც ითვალისწინებს ოპოზიციური პარტიების აკრძალვას და ყველა წევრის პოლიტიკური საქმიანობის აკრძალვას მომავალში. ადმინისტრაციული ბრალდებები ქუჩის მომიტინგეების წინააღმდეგ სისხლის სამართლის პროცედურებით ჩანაცვლდა.” – წერს სალომე ზურაბიშვილი.
შეგახსენებთ, გუშინ, 13 ოქტომბერს ცნობილი გახდა, რომ თუ საკონსტიტუციო სასამართლო პარტიას რეგისტრაციას გაუუქმებს, მასთან დაკავშირებულ პოლიტიკოსებს პარტიის ხელმძღვანელობა, წევრობა, თანამდებობის დაკავება და არჩევნებში მონაწილეობა აეკრძალებათ. პირველ ეტაპზე იგეგმება ნაციონალური მოძრაობის აკრძალვა. მზადაა შესაბამისი საკონსტიტუციო სარჩელიც.
გარდა ამისა, მკაცრდება ადმინისტრაციულ სამართალდარღვევათა კოდექსის 173-ე მუხლი. პოლიციისადმი მესამედ დაუმორჩილებლობა სისხლის სამართლის წესით – 1 წლამდე პატიმრობით დაისჯება;
აქციის მონაწილის მიერ სახის ნიღბით დაფარვა, ცრემლსადენი ან მომწამვლელი ნივთიერების ქონა, გზის გადაკეტვა ან დროებითი კონსტრუქციის მოწყობის პირველივე შემთხვევა გამოიწვევს ადმინისტრაციულ პატიმრობას 15 დღემდე ვადით.