მექსიკაში წყალდიდობის შედეგად, სულ მცირე, 27 ადამიანი დაიღუპა, ათობით მოქალაქე დაკარგულად ითვლება, – ამის შესახებ ინფორმაციას „როიტერი“ ავრცელებს.
ძლიერი წვიმით გამოწვეულმა მეწყერმა ზოგიერთ მუნიციპალიტეტში მდინარეების ადიდება და ელექტროენერგიის გათიშვა გამოიწვია.
მედიის ცნობით, მხოლოდ იდალგოს შტატში 16 ადამიანი დაიღუპა, ათასი სახლი და ასობით სკოლა დაზიანდა.
პუებლას შტატში, სულ მცირე, ცხრა ადამიანი დაიღუპა, ხუთი მოქალაქე დაკარგულად ითვლება.
ვერაკრუსის შტატში ორი მოქალაქეა დაღუპული.
მექსიკის თავდაცვის სამინისტროში აცხადებენ, რომ დაზარალებული ტერიტორიების მონიტორინგის, ევაკუაციისა და დასუფთავების მიზნით, სტიქიური უბედურების ზონაში 5 400-ზე მეტი თანამშრომელი განალაგეს.