აფრასიძეებმა მოუხადეს ბოდიში იმ ადამიანების ოჯახებს, ვინც მათ მოკლეს? – ამის შესახებ „ნაციონალური მოძრაობს“ ერთ-ერთმა ლიდერმა გიორგი ბარამიძემ “ჯორჯიან თაიმსის” გადაცემაში “ჩაი” მაკა რაზმაძესთან საუბრისას აღნიშნა.
“დადეშქელიანი ბადრის ოჯახს, ვინც მათ მოკლეს ბოდიში მოუხადეს?! – ერთად იქეიფეს აი, ამ ნაძირლებმა, სახლში მიაცილეს, იქ აუხირდნენ და სახლის კართან კალაშნიკოვის ავტომატით მიაცხრილეს….
ვიცი, რომ სისულეელებს მედავებიან… რომ იცოდნენ სახლში ბავშვები და ქალები ჰყავდათ, პოლიციას რატომ ესროლეს?!”, – ამბობს ბარამიძე აფრასიძეების საქმეზე საუბრისას.
2004 წლის 24 მარტს, სვანეთის სოფელ ეცერში, შსს-სა და უშიშროების თანამშრომლების მონაწილეობით, ფართომასშტაბიანი სპეცოპერაცია ჩატარდა, რომელსაც მაშინდელი შს მინისტრი გიორგი ბარამიძე ხელმძღვანელობდა. მაშინ გავრცელდა ინფორმაცია, რომ ოპერაცია განსაკუთრებით საშიში დამნაშავეების დაკავებას უკავშირდებოდა. სპეცოპერაციის დროს ევგენი აფრასიძე და მისი ვაჟი ომეხ აფრასიძე მოკლეს. მოკლულის კიდევ ორი შვილი გოჩა და შმაგი აფრასიძეები დააკავეს და 19 და 17 წლით პატიმრობა მიუსაჯეს. ძმებმა საპყრობილე 2013 წელს, ამნისტიის გამოცხადების შემდეგ დატოვეს.