ჟურნალისტი ინგა გრიგოლია ეკატერინე ტიკარაძის ჯანდაცვის მინისტრის პოსტის დატოვების საკითხს სოციალურ ქსელში ეხმაურება:
“მთელი ღადაობა ისაა, ჯანდაცვის მინისტრი რომ გადადგა და შეშინებული პრემიერი ხელს ვერ აწერს მის განცხადებას, ეშინია, ბოსის ოჯახმა არ გადააყოლოს ტიკარაძეს და თან გვყავს ჯანდაცვის მინისტრი, თან აღარ”, – წერს გრიგოლია “ფეისბუქის” პირად გვერდზე.
მინისტრობის 30 თვის თავზე, ეკატერინე ტიკარაძემ ჯანდაცვის მინისტრის თანამდებობა დატოვა. 9 დეკემბერს, „ქართული ოცნების“ ოფისში, მოულოდნელად დანიშნულ ბრიფინგზე, ჟურნალისტების წინაშე ის სრულიად მარტო, თანაგუნდელებისა და თანაპარტიელების გარეშე წარსდგა.
უკავშირდება თუ არა მისი გადადგომა პრემიერთან შესაძლო უთანხმობას, ის ამ თემაზე არ საუბრობს. თუმცა თქვა, რომ რჩება გუნდში და მუშაობას პარტიის პოლიტსაბჭოში განაგრძობს.