მწერალი, მსახიობი და უბრალოდ, კოლორიტული ადამიანი – გივი სიხარულიძე, როგორც ყოველთვის, დაუფარავად გვიზიარებს თავის შეხედულებებს საქართველოში მიმდინარე მოვლენებზე.
გთავაზობთ ამონარიდებს რესპონდენტის მოსაზრებიდან, რომელიც ჟურნალში “გზა” გამოქვეყნდა:
“დასაწყისში უნდა ვთქვა, რომ მე არანაირი სიძულვილი არა მაქვს ყოფილი პრეზიდენტის მიმართ. ზოგს ის ეჯავრება, ზოგს თავის კერპად მიაჩნია, მე კი, ლოიალურად ვარ განწყობილი. მიუხედავად ამისა, თუ ჩვენ თანამედროვე, ცივილიზებული მართლმსაჯულება, პროკურატურა და სასამართლო გვაქვს, მაშინ საქართველოში განსაკუთრებული პატიმარი არ უნდა არსებობდეს. პატიმარი პატიმარია და ნებისმიერმა მსჯავრდადებულმა კანონის წინაშე უნდა აგოს პასუხი, ოღონდ, ერთი პირობით – სიმართლემ უნდა იზეიმოს…”
“ჩემი ნება რომ იყოს, მარტო კოსტიუმების შეძენის, ბოტოქსის ან სამედიცინო პროცედურების გამო, ყოფილ პრეზიდენტს ხმასაც არ გავცემდი, ღმერთმა მოახმაროს! რატომ? – მას დაშლილი ქვეყანა ჩაბარდა, რომელსაც ფეხზე დაყენება სჭირდებოდა და ის ამას ცდილობდა, მაგრამ მის მმართველობას ერთი სერიოზული ხარვეზი ჰქონდა: სააკაშვილმა შექმნა კანონები, რომელიც მერე თვითონვე დაარღვია, არადა, კანონი მაშინ არის კარგი, როცა მას ყველა იცავს…”
“პრემიერ-მინისტრი ღარიბაშვილი, რომელიც ვიღაცებს არ მოსწონთ, მე მომწონს. მისი გაკეთებული საქმეებიც მომწონს, რადგან ყველაფერში თავის გულს და ჯიგარს დებს. თანაც, ღარიბაშვილი ის კაცია, რომელმაც საქართველოში ერთნაირსქესიანთა ქორწინება არ დაუშვა. ამის გამო ის ჩემთვის იდეალური პრემიერი და კარგი ადამიანია…”
“როცა ადამიანი პოლიტიკაში “ცალი კალოშით” მოდის და ცოტა ხანში მილიონერი ხდება, ეს ამაზრზენია, მაგრამ ზოგჯერ ამას ისეთ ხალხს აბრალებენ, რომ ვერ ვიჯერებ…”
სტატიას სრულად ჟურნალ “გზის” 9 დეკემბრის ნომერში წაიკითხავთ.
ხათუნა ჩიგოგიძე
წყარო: – kvirispalitra.ge