აშშ-ის გამოძიების ფედერალური ბიურო აქვეყნებს ფოტოებს, რომელზეც სავარაუდოდ კონსერვატორი კომენტატორის, ჩარლი კირკის მკვლელია ნაჩვენები. FBI საზოგადოებას პირის იდენტიფიცირებაში დახმარებას სთხოვს.
ამასთან, „ბიბისი“ ფედერალური ბიუროს მიერ გავრცელებულ კიდევ რამდენიმე ფოტოს აქვეყნებს, სადაც იმ შენობის სახურავზე მყოფი პირი ჩანს, საიდანაც კირკს ესროლეს.
მათივე ცნობით, სროლის შემდეგ თავდამსხმელი კამპუსის შენობის სახურავიდან გადახტა და მიიმალა.
ფედერალური ბიუროს ინფორმაციით, გამომძიებლებმა ტყეში იპოვეს იარაღი და ფეხსაცმლის კვალი, რომელიც, სავარაუდოდ დამნაშავეს ეკუთვნოდა. იუტის შტატის პოლიციის კომისრის, ბო მეისონის განცხადებით, მკვლელობაში ეჭვმიტანილი, სავარაუდოდ „კოლეჯის ასაკისაა“.
ცნობისთვის, 10 სექტემბერს, აშშ-ში, დონალდ ტრამპის მომხრე ცნობილ ბლოგერს, ჩარლი კირკს საჯარო ღონისძიების დროს ესროლეს. კირკს, რომელიც დონალდ ტრამპის აქტიური მხარდამჭერი და მისი საპრეზიდენტო კამპანიების მონაწილე იყო, იუტა ველის უნივერსიტეტის ღონისძიებაზე სიტყვით გამოსვლისას ესროლეს. მას იარაღიდან ნასროლი ტყვია ყელის არეში მოხვდა და საავადმყოფოში გადაყვანის შემდეგ მალევე დაიღუპა.
31 წლის კონსერვატორი კომენტატორის, ჩარლი კირკის მკვლელს პოლიცია ამ დრომდე ეძებს.
აშშ-ის გამოძიების ფედერალურმა ბიუროს ინფორმაციით, თავდამსხმელი სახურავიდან გადახტა და მიიმალა. მედიის ცნობით, პოლიციას სავარაუდო დამნაშავის ფოტოებიც აქვს, თუმცა, გამოძიების ინტერესებიდან გამომდინარე, ჯერ მათი გავრცელებისგან თავს იკავებენ. გავრცელებული ინფორმაციით, მკვლელობაში ეჭვმიტანილი, სავარაუდოდ, კოლეჯის ასაკისაა.