“რესპუბლიკური პარტიის” ერთ-ერთი ლიდერი დავით ბერძენიშვილი “ფეისბუქის” პირად გვერდზე ექს-პრეზიდენტის მიერ სასამართლო პროცესზე წარმოთქმულ სიტყვას ეხმაურება და წერს, რომ “მიშამ კლასი დაკარგა”.
“მიშას თურმე დღემდე ჰგონია, რომ 2007 წ. შემოდგომის მასშტაბურ აქციებს პუტინის დაგეგმილად, პატარკაციშვილის მოწყობილად თუ გამოაცხადებს კვლავ, ამით გამოძვრება. ეს არც წესიერი და არც ჭკვიანური არ არის. მეტს ჯერ არ ვიტყვი. ვწუხვარ, რომ მიშამ კლასი დაკარგა”, – წერს ბერძენიშვილი. აღნიშნული პოსტი კომენტარებში კი, სოციალური ქსელის მომხმარებლის კითხვის საპასუხოდ დასძენს:
“2003 ში ივანოვმა შევარდნაძე კრწანისში წაიყვანა და 2004- ში აბაშიძე მოსკოვში. 2004- ის გაზაფხულზე. მიშამ ბრძანა, პუტინს ჩავარდება თვალებში, დასავლელ ლიდერებს ჯობია. ესენგრდან ვერ გამოვიყვანეთ რესპებმა და რუს ოკუპანტებს სამშვიდობო სტატუსი ვერ გავაუქმებინეთ. ამის მიუხედავად არც ერთ ჭკუათმყოფელს მიშა პუტინის შეკვეთების შემსრულებლად არ გამოუცხადებია. არც შევარდნაძის ლეკვად… 6 წელი იყო მოქ.კავშირში და პოლიტიკურ პლურალიზმს სჯობდა ჟვანიასთან ერთად.”
დღეს, 29 ნოემბერს, საქართველოს ექს-პრეზიდენტი მიხეილ სააკაშვილი სასამართლოს წინაშე დღეს პირველად წარდგა. სასამართლო კოლეგიის გადაწყვეტილებით, სხდომა მედიისთვის ღია იყო. თავდაპირველად, დაცვის მხარემ მოსამართლეთა კოლეგიას შუამდგომლობით მიმართა, რომ საქმის რეზონანსულობიდან და საზოგადოების დიდი ინტერესიდან გამომდინარე მომხდარიყო სასამართლო პროცესის ტრანსლირება. მოსამართლეთა კოლეგიამ აღნიშნული შუამდგომლობა დააკმაყოფილა.
სასამართლო პრცესს სამი მოსამართლე უძღვება. კერძოდ, მაია ქოქიაშვილი, ნინო ელიაშვილი და ლიანა ორკოდაშვილი, რომლებიც საბოლოო გადაწყვეტილებას ერთობლივად მიიღებენ.
პროცესს ბრალდებული მიხეილ სააკაშვილი დაესწრო.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.
მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.
https://mix.metronome.ge/23993-2/