თეთრი სახლის ინფორმაციით, აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის ისტორიული შეხვედრა ალასკის ქალაქ ანკორიჯში ადგილობრივი დროით 11:00 საათზე (თბილისის დროით 23:00 საათზე) დაიწყება.
როგორც კრემლი აცხადებს, შეხვედრის პროგრამა უკვე შეთანხმებულია. მათი თქმით, შეხვედრა გაიმართება გაფართოებულ ფორმატში 5+5-ის ფორმულით, რომელიც გულისხმობს, რომ პრეზიდენტების გარდა, შეხვედრაში მონაწილეობას მიიღებს თითოეული ქვეყნის დელეგაციის ხუთი წევრი.
როგორც ცნობილია, შეხვედრის მთავარი თემა უკრაინაში მიმდინარე ომი იქნება და განიხილება კრიზისის დარეგულირების მთავარი მექანიზმები.
შეხვედრის დაწყებამდე რამდენიმე დღით ადრე, დონალდ ტრამპმა განაცხადა, რომ რუსეთის პრეზიდენტთან მოლაპარაკების შემდეგ, პირველი უკრაინის პრეზიდენტ, ვოლოდიმირ ზელენსკის დაურეკავს, შემდეგ კი ევროპელ ლიდერებს.
ასევე ცნობილია, რომ მოლაპარაკებების დასრულების შემდეგ გაიმართება დონალდ ტრამპისა და ვლადიმირ პუტინის ერთობლივი პრესკონფერენცია.
დონალდ ტრამპმა ჟურნალისტებთან საუბრისას განაცხადა, რომ თუკი შეხვედრის შემდეგ პუტინი ომის დასრულების გადაწყვეტილებას არ მიიღებს, ამას ცუდი შედეგები მოყვება.