“კობახიძის მოსაზრებებებს მის ანალიტიკას კომენტარს უნდა უკეთებდეს არა პოლიტიკოსი, არამედ ექიმი-ფსიქიატრი,” – ამის შესახებ პოლიტიკოსმა გედევან ფოფხაძემ განაცხადა და ირაკლი კობახიძის განცხადებას გამოეხმაურა, რომლის მიხედვითაც მან ყოფილი თანაგუნდელები “დიფ სთეითის მიერ ჩანერგილებად” გამოაცხადა.
მან მოცემული სიტუაცია ბოლშევიზმს შეადარა, როდესაც “საგნობრივად კი არ გედავებიან, უბრალოდ გაცხადებენ, რომ შენ ხარ ცუდი”.
“კობახიძის ისტორიებს, მის მოსაზრებებებს მის ანალიტიკას მაინც კომენტარს უნდა უკეთებდეს არა პოლიტიკოსი, არამედ ექიმი-ფსიქიატრი, რაც გაცილებით უფრო ადეკვატური იქნება მასთან მიმართებაში.
ამ კონკრეტულ ისტორიასთან დაკავშირებითაც – არაფერი მსგავსი არ ყოფილა, არანაირ განხილვებში, არანაირ მსჯელობებში, არავის არანაირი პროტესტი არ გამოუთქვამს.
საგნობრივად კი არ გედავებიან, ეს არის ბოლშევიზმი, როცა არ აქვს მნიშვნელობა დავის საგანს, უბრალოდ გაცხადებენ, რომ შენ ხარ ცუდი, შენ ზოგადად ხარ ვიღაცის აგენტი და ამიტომ რა აზრი აქვს შენთან რამეზე კამათს. ეს არის კლასიკური ბოლშევიზმი, რასაც ქადაგებს კობახიძე და დეფაქტო სახელისუფლებო რეჟიმი,” – განაცხადა გედევან ფოფხაძემ.
“ქართული ოცნების” პრემიერ-მინისტრის თქმით, 2018 წელს პარტიაში “ჩანერგილი ადამიანები” ჰყავდათ.