ტელეწამყვანი და მსახიობი ნიკოლოზ ქავთარაძე “ფეისბუქის” პირად გვერდზე ილია კოკაიას გარდაცვალების ამბავს ეხმაურება:
“დილით ეს საშინელი ამბავი გავიგე. ილია კოკაია დაიღუპა.
ალბათ 15 წლის წინ გავიცანი.
ზესტაფონის საფეხბურთო ქალაქად გადაქცევის იდეით იყო შეპყრობილი.
გამოუვიდა.
რამდენიმე წელი ვიმეგობრეთ. 5 წლის წინ გაიყო ჩვენი გზები.
დღევანდელ დღემდე ვთვლი, რომ “ზესტაფონი” საუკეთესო საფეხბურთო პროექტი იყო დამოუკიდებელი საქართველოს ისტორიაში. და ეს პირადად ილიას დამსახურება იყო.
ვუსამძიმრებ ოჯახს, ახლობლებს, მეგობრებს, “ზესტაფონის” გულშემატკივრებს”, – წერს ქავთარაძე სოციალურ ქსელში.
საფეხბურთო კლუბ „ზესტაფონის” დამფუძნებელი და პრეზიდენტი, ილია კოკაია ტრაგიკულად დაიღუპა. 65 წლის ბიზნესმენი მწვერვალ „დედაენის” დალაშქვრისას დაშავდა, თანმხლები პირის განცხადებით, კოკაიას ფეხი დაუცდა, თავი დაარტყა და სამაშველო სამსახურმა მისი გადარჩენა ვერ შეძლო.
ილია კოკაია მთამსვლელობით ბოლო წლებში იყო გატაცებული და საქართველოსა და უცხოეთში რამდენიმე მწვერვალი დალაშქრა. მათ შორის „მონბლანი”, თეთნულდი” და „ყაზბეგი”.
მწვერვალი „დედა ენა” (გოგებაშვილი) მდებარეობს მცხეთა-მთიანეთში, სტეფანწმინდის მუნიციპალიტეტში, ზღვის დონიდან 3493 მეტრზე.
საფეხბურთო კლუბი „ზესტაფონი” ილია კოკაიამ 2004 წელს შექმნა და მალევე აქცია საქართველოს ერთ-ერთ უძლიერეს კლუბად. 2008 წელს „ზესტაფონმა” საქართველოს თასი მოიპოვა. 2010-11 და 2011-12 წლების სეზონებში კი საქართველოს ჩემპიონი გახდა და საქართველოს სუპერთასსაც დაეუფლა.