საქართველო მიწვეული არ არის არაფორმალურ შეხვედრაზე, სადაც ევროკავშირის გაფართოების საკითხს განიხილავენ.
შეხვედრა ევროკავშირის თავმჯდომარე ქვეყნის, დანიის დედაქალაქში, კოპენჰაგენში 1-2 სექტემბერს გაიმართება. არაფორმალურ შეხვედრაზე შეიკრიბებიან ევროკავშირის 27 წევრი სახელმწიფოს ევროპული საქმეთა მინისტრები, უკრაინის, მოლდოვის, დასავლეთ ბალკანეთისა და თურქეთის წარმომადგენლებთან ერთად.
“2024 წლის ნოემბერში საქართველოს მთავრობამ განაცხადა, რომ ქვეყნის ევროკავშირში ინტეგრაციის პროცესის 2028 წლამდე შეჩერება გადაწყვიტა. ევროკავშირმა ეს გაითვალისწინა. დანიის მხრიდან [ევროკავშირის საბჭოს] თავმჯდომარეობა პოლონეთის თავმჯდომარეობის დროს შექმნილ პრეცედენტს მიჰყვება და, ზოგადი წესის მიხედვით, საქართველოს კანდიდატი ქვეყნის სტატუსით არ მოიწვევს“, – აცხადებენ დანიის საგარეო საქმეთა სამინისტროში.