ტელეწამყვანი გიორგი ჯაჯანიძე “ფეისბუქის” პირად გვერდზე საზოგადოებაში არსებულ დაპირისპირებაზე წერს:
“სულ რას ვფიქრობ იცით?
ჩვენ ხომ ქრისტიანული ქვეყანა ვართ, ჩვენ ხომ ყოველთვის მივდივართ ქრისტიანულ დღესასწაულებზე, ვულოცავთ ერთმანეთს, მიტევების დღეებიც გვაქვს, შვიდ გზის ზეთის ცხება. შეწყალებასაც ვითხოვთ.
ვინც ეკლესიური არ არის, ის ჰუმანიზმზე, სიყვარულზე და სიკეთეზე საუბრობს.
ანუ, ჩვენ ყველას ბედნიერ ქვეყანაში ცხოვრება და სიცოცხლე გვინდა.
უამრავი მაგალითები გვაქვს და ქრისტიანული მოძღვრებაც გვასწავლის რა დამღუპველია ამპარტავნება, აუცილებელია სიყვარული, თავმდაბლობა და მიტევება.
თუ მორწმუნენი ვართ, ან რწმენის გარეშე კეთილშობილები და არა ფარისევლები, თუ მხოლოდ სალაპარაკოდ და პოზად არ გვაქვს გადაქცეული ღმერთის სახელი, ან სამშობლოს სიყვარული, როგორ არ გამოჩნდა აქამდე ადამიანი, რომელიც საყოველთაო მიტევებისკენ მოუწოდებს დაპირისპირებულ პოლიტიკოსებს, ერთ გუნდად შეკრავს და ამ პატარა, გადაშენების გზაზე დამდგარ ერს უშველის. მაინცდამაინც უნდა ვიბრძოლოთ და ვინც გაიმარჯვებს ის უშველის და ის იქნება ჩვენი ,,პატრონი”? დამარცხებულიც ხომ ქართველია და ჩვენია?!
რატომ გვძულს, რატომ ვსჯით და დავცინით ერთანეთს? – ეს ქვეყანა ხომ ერთი დიდი ოჯახია?! სად გაგონილა ერთ ოჯახში რომ უნდა იბრძოლო და დაამარცხო ოჯახის წევრი.
სამწუხაროდ გაგონილა კი არა პირდაპირ მონაწილეები ვართ.
მართლა მიკვირს და გულწრფელად ვწერ, თან კითხვის დასმის რეჟიმში ვწერ, მეშინია არ შემომივარდეთ და შავი დღე არ მაყაროთ, თან ისე გაქვთ აგრესია გამჯდარი, არ მინდა კიდე ნერვები მოგიშალოთ.
“მიუტევე, რამეთუ არა იციან რას იქმან” – ვაი, თუ იციან რასაც იქმან და სულაც არ ანაღვლებთ ვინმე მიუტევებთ თუ არა.
მტერი – სანამ გარე მტერი კბილებს ილესავს ჩვენს დასამარცხებლად, მანამ ჩვენ ვმტრობთ და ვანადგურებთ ერთმანეთს ფიზიკურად და მორალურად
მაპატიეთ კითხვა რომ დავსვი და ცოტა აზრიც გამოვთქვი. მერე სხვა დროს, მე თავად გავცემ ამ კითხვის პასუხს, ამ აზრსაც გადავაფასებ. მართალია გვიან იქნება, მაგრამ ესეც ღვთის ნება იქნება ალბათ”, – წერს ჯაჯანიძე სოციალურ ქსელში.