CNN-ის ცნობით, თეთრი სახლის მაღალჩინოსანმა განაცხადა, რომ პრეზიდენტ დონალდ ტრამპის გადაწყვეტილებით, აშშ გაეროს განათლების, მეცნიერებისა და კულტურის ორგანიზაციას (UNESCO-ს) დატოვებს.
„პრეზიდენტმა ტრამპმა გადაწყვიტა, რომ აშშ გამოიყვანოს UNESCO-დან – რომელიც მხარს უჭერს ვოუქ, დაპირისპირების გამომწვევ კულტურულ და სოციალურ საკითხებს, რომელიც სრულად ამოვარდნილია საღი აზრის პოლიტიკიდან, რასაც ამერიკელებმა მხარი ნოემბერში დაუჭირეს“, – თქვა თეთრი სახლის სპიკერის მოადგილემ, ანა კელიმ.
ამას გარდა, სახელმწიფო დეპარტამენტის სპიკერმა, ტემი ბრიუსმა აღნიშნა, რომ UNESCO-ში აშშ-ს მონაწილეობის გაგრძელება არ წარმოადგენს „ეროვნულ ინტერესებს“.
გაეროს სპეციალიზებულ სააგენტოს აშშ ოფიციალურად 2026 წლის 31 დეკემბერს დატოვებს.
შეგახსენებთ, აშშ UNESCO-ს დამფუძნებელი წევრი იყო 1945 წელს, თუმცა ფინანსური გაუმართაობისა და ამერიკის ინტერესების წინააღმდეგ მიკერძოებების საბაბით აშშ-მ სააგენტო 1984 წელს დატოვა. აშშ UNESCO-ს ხელახლა ჯორჯ უოკერ ბუშის პრეზიდენტობის დროს შეუერთდა.