“დღეს დაწერეს, რომ ნიუ ჯერსიში, ახალგაზრდა ქართველი მამაკაცი ტყეში ჩამომხრჩვალი ნახეს. რამდენიმე დღის მანძილზე ეძებდნენ. კამერებმა დააფიქსირეს, როგორ გაიარა პარკინგის საკმაოდ დიდი ტერიტორია ზურგჩანთით და შევიდა ტყეში…” – ამის შესახებ ჟურნალისტი დავით ნიკურაძე სოციალურ ქსელში წერს.
“დღეს დაწერეს, რომ ნიუ ჯერსიში, ახალგაზრდა ქართველი მამაკაცი ტყეში ჩამომხრჩვალი ნახეს. რამდენიმე დღის მანძილზე ეძებდნენ. კამერებმა დააფიქსირეს, როგორ გაიარა პარკინგის საკმაოდ დიდი ტერიტორია ზურგჩანთით და შევიდა ტყეში. რა უჭირდა, რამ აიძულა ამ სასოწარკვეთილ ნაბიჯზე წასვლა, არ ვიცი. ამ ტრაგედიის ისტორიას არ ვიცნობ.
ზოგადად ვიტყვი ჩემს სათქმელს. ემიგრაციაში ბევრი ადამიანი ვერ უმკლავდება სტრესს, ოჯახის წევრების, მეგობრების და ახლობლების გარეშე ყოფნას და მონატრებას. განსხვავებით ევროპისგან, სადაც ქართველ ემიგრანტებს ეს მონატრება და მარტოობა უვიზო რეჟიმმა შეუმსუბუქა და დედებს წლობით უნახავ შვილებთან ჩახუტების საშუალება მისცა, ამერიკიდან წამოსვლა ან ამერიკაში ოჯახის წევრების ჩამოყვანა რთულია. ყველამ ვერ შეძლო ალუდა ღუდუშაურივით მეუღლის ამერიკაში სამშობიაროდ ორჯერ ჩამოყვანა, შვილებისთვის ამერიკული პასპორტები რომ გაეკეთებინა. ემიგრანტების უდიდესი ნაწილი წლების განმავლობაში მარტოობაში, შვილების და მშობლების მონატრებაში ცხოვრობს.
ევროპაში კი სხვა ვითარებაა. თითქმის ყოველ თვე ნახულობენ ბიუჯეტური რეისებით ჩასული შვილები მონატრებულ მშობლებს. უვიზო რეჟიმმა მანძილიც შეამცირა, მონატრებაც და საყვარელ ადამიანებზე დარდიც.
ოცნების მომხრე ყველა ის ნაგავი, რომელიც დღეს ევროპასთან უვიზო რეჟიმის გაუქმებაზე თანახმაა და მეტიც, სავიზო რეჟიმის “სარგებელზე” ქადაგებს, პოტენციური მკვლელია. ხელს აწერს ევროპასთან ისეთი ზღუდის აშენებას, რომელიც უამრავ ოჯახს გაამწარებს და ემიგრანტებს ისევ მარტოობისთვის, დეპრესიისთვის და სასოწარკვეთისთვის გაწირავს. ყველას ცხოვრებაში დგება რთული დღეები და ბევრისთვის სასოწარკვეთის მომენტიც. ამ დროს გვერდით მყოფი ახლობელი ადამიანი, შვილთან ჩახუტება ან მშობლის მხარზე თავის მიდება უფრო დიდი შვებაა, ვიდრე ნებისმიერი ფსიქოთერაპია.
სიმშვიდე ლევანის სულს, გამძლეობა მის საყვარელ ადამიანებს და ჯანმრთელობა სამშობლოდან გადახვეწილ ყველა ემიგრანტს.” – წერს ჟურნალისტი დავით ნიკურაძე.
ცნობისთვის, ამერიკაში მცოვრებ ლევან გაბედავას ახლობლები რამდენიმე დღის განმავლობაში ეძებდნენ.