დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით შესაძლოა, საჭირო იყოს ვაქცინის მეოთხე დოზის გაკეთებაც.
„ ამის შესახებ მიმდინარეობს კვლევა. გარდა ამისა, გვაქვს დაახლოებით 50-მდე მეოთხე დოზა. ეს არიან ადამიანები, რომლებიც ხშირად მოგზაურობენ. უკვე შემცირდა იმ ქვეყნების რაოდენობა, რომლებიც არ სცნობდნენ „სინოფარმით“ და „სინოვაკით“ აცრილებს და მათი მოგზაურობისთვის საჭირო იყო რომელიმე RNM ვაქცინის სერტიფიკატის ქონა.
ჩვენი კანონმდებლობით დაშვებულია, რომ თუ თქვენ მიემგზავრებით ისეთ ქვეყანაში, სადაც შეიძლება არ შეგიშვან, შეგიძლიათ აიცრათ „ფაიზერით“ მესამე დოზით და 28 დღის შემდეგ ისევ გაიმეოროთ მეოთხე დოზა. არ არის პრობლემა. ბევრი ჩვენი სტუდენტი, ვინც მიემგზავრებოდა დასავლეთის ქვეყნებში და სადაც შესაძლებელი იყო, რომ ეს რეგულაციები ყოფილიყო, ოთხი დოზით არის აცრილი“, – განაცხადა გამყრელიძემ.
აღნიშნულ ინფორამციას ტელეწამყვანი ეკატერინა ფანგანი “ფეისბუქის” პირად გვერდზე ეხმაურება და წერს:
“აქ არის საუბარი საზღვარგარეთ მოგზაურობაზე! კომენტარებში ხდება უბედურება! არავის არ აქვს გახსნილი ბმული და წყევლიან ამ კაცს და აგინებენ წარმოუდგენელი სიტყვებით.
ამ ხალხს არ სჭირდება ინტერნეტი! საერთოდ, საჯარო პოსტებზე მარტო უარყოფითი კომენტარებია და, მგონი, ზედმეტია მათთვის ინტერნეტი! ამდენი სიბოროტე რომ იფრქვევა დედამიწაზე, წარმოუდგენელია!
განსაკუთრებული მარგალიტები დავსქრინე და იხილეთ კომენტარებში. ყველამ უნდა იცოდეს, რასთან გვაქვს უკვე საქმე, რა დონის სიბეცესაა და სისატიკესთან!”, – წერს ფანგანი სოციალურ ქსელში.
