ე.წ. ციანიდის საქმეზე მსჯავრდებულ დეკანოზი გიორგი მამალაძეს COVID – 19 დაუდასტურდა.
აღნიშნულ ინფორმაციას “აკრედიტაცია საზღვრების გარეშე” პრეზიდენტი, პროფესორი გიორგი ფხაკაძე “ფეისბუქის” პირად გვერდზე ეხმაურება:
“არაპროფესიონალიზმი კლავს!
ყველა სამართალდამცველი, ყველა სამედიცინო პერსონალი, ყველა საგანმანათლებლო სფეროს წარმომადგენელი და ყველა სერვის სფეროში ჩართული ადამიანი უნდა იყოს 100% აცრილი ფაიზერ-ბიონტეკის ვაქცინით!
პსრ ტესტი არ არის ზუსტი ტესტი ის მხოლოდ 60%-ით აჩვენებს სწორ პასუხს!
ციხეებში ფაიზერ-ბიონტეკის ვაქცინით აცრის მაჩვენებელი საერთოდ 100% უნდა იყოს!
დავიღალეთ რა! ანტივაქსერული ქმედებები საქართველოში უდრის – რუსულ საოკუპაციო ძალებთან კოლაბორაციას!
ქვეყანა უნდა გადავიდეს ერთ ვაქცინაზე, თავს ნუ ვიტყუებთ!
კოვიდ სტატუსი უნდა დაინერგოს, რაც შეიძლება, მალე!
კოვიდ სტატუსი ნიშნავს – ვაქცინირებული”, – წერს ფხაკაძე სოციალურ ქსელში.
ცნობისთვის, მსჯავრდებული დეკანოზი, გიორგი მამალაძე “ვივამედის” კლინიკაში მოათავსეს.
“სპეციალური პენიტენციური სამსახური: მსჯავრდებულ გ.მ-ს კოვიდ-19 დაუდასტურდა და შემდგომი დაკვირვების მიზნით, სამოქალაქო სექტორის კლინიკაში მოთავსდა საზოგადოების და მედიის მაღალი ინტერესის გათვალისწინებით გავმარტავთ, რომ მსჯავრდებული გ.მ. მე-18 (სამკურნალო) დაწესებულებიდან კლინიკა “ვივამედშია“ გადაყვანილი.
მას მიმდინარე წლის 13 ნოემბერს COVID -19-ის დამახასიათებელი სიმპტომები გამოუვლინდა (რესპირატორული სიმპტომები,ტემპერატურის უმნიშვნელო მატება). მსჯავრდებულს ჩივილებიდან გამომდინარე ჩაუტარდა PCR ტესტირება და მას კოვიდ-19 დაუდასტურდა.
მსჯავრდებულის ჯანმრთელობის მდგომარეობა სტაბილურია, თუმცა შემდგომი დაკვირვების მიზნით, კლინიკა “ვივამედში“ მოთავსდა და მედპერსონალის მეთვალყურეობის ქვეშ იმყოფება”, – ნათქვამია განცხადებაში.