არ ვიცი, შეიძლება რამდენიმე წელი ვიჯდე, რადგან რეჟიმს ასე უნდა, – ამის შესახებ დაპატიმრებულმა ჟურნალისტმა, მზია ამაღლობელმა სასამართლო პროცესზე განაცხადა.
მისივე თქმით, ათამდე გამომძიებელი იყო მის საქმეში ჩართული, მაგრამ არავინ არაფერი არ გამოიძია.
„ჩემს თაობაში მედიაში ერთ-ერთი მათგანი ვარ, ვინც უარი თქვა და ზურგი აქცია მაამებლურ საბჭოთა ჟურნალისტიკას.
მე და ჩემმა მეგობრებმა გაზეთი რომ დავაარსეთ, იმ დროს აჭარაში რუსული ბაზა იყო, ჩოლოქზე საზღვარი გვქონდა დანარჩენ საქართველოსთან. როცა მე და ჩემი მეგობრები ამ უსამართლობაზე ვწერდით, ძალიან მალე მოვიპოვეთ საზოგადოების კეთილგანწყობა.
პროფესიულ, კრიტიკულ ჟურნალისტიკას მთავრობები არ სწყალობენ და ეს არ არის საშიში მაშინ, როცა ქვეყანაში დამოუკიდებელი სასამართლო გაქვს.
ათამდე გამომძიებელი იყო ჩემს საქმეზე ჩართული, მაგრამ არავინ არაფერი არ გამოიძია.
ვინმე დგებუაძემ დაიგინა, რომ „სისხლით ჩამსვავდა“ და ჩამსვა. არ ვიცი, შეიძლება რამდენიმე წელი ვიჯდე, რადგან რეჟიმს უნდა ასე.” – განაცხადა მზია ამაღლობელმა.