აშშ-ის პრეზიდენტმა, დონალდ ტრამპმა ქვეყნის საიმიგრაციო სამსახურის თანამშრომლებთან დაპირისპირებულ პირებთან დაკავშირებით სოციალურ ქსელში პოსტი გამოაქვეყნა.
„ტეხასიდან ვბრუნდებოდი და გაოცებული ვუყურებდი, როგორ ესროდნენ ბანდიტები ქვებსა და აგურებს საიმიგრაციო სამსახურის თანამშრომლებს, როდესაც ისინი თავიანთი ან სამსახურეობრივი მანქანებით გადაადგილდებოდნენ. ამ მანქანებს უზარმაზარი ზიანი მიადგათ. ზუსტად ვიცი, ამ თანამშრომლებს უჭირთ ამ ყველაფრის დაშვება, რადგან ეს აჩვენებს უპატივცემულობას კანონისა და წესრიგის მიმართ“, – წერს ტრამპი.
ამასთან, პრეზიდენტმა შიდა უსაფრთხოების დეპარტამენტსა და სამართალდამცველებს დაავალა, დააკავონ ნებისმიერი პირი, რომელიც საიმიგრაციო სამსახურის თანამშრომლებს თავს დაესხმება.
„მე ვაძლევ სრულ უფლებამოსილებას საიმიგრაციო სამსახურის თანამშრომლებს, დაიცვან თავი, ისევე როგორც იცავენ საზოგადოებას. მინდა, აღარასდროს მოხდეს, რომ სამართალდამცავი ორგანოების თანამშრომლების მანქანაზე თავდასხმა მოხდეს! დაკავებისა და პატიმრობის უფლებამოსილება დაუყოვნებლივ გაიცა“, – აღნიშნავს აშშ-ის ლიდერი.