შავ ზღვაში, დეკემბერში ჩაძირული რუსული ტანკერებიდან, მაზუთმა გაჟონა, რომელმაც აფხაზეთის სანაპირო ზოლი დააბინძურა.
აღნიშნულ თემაზე “მეტრონომი” “საქართველოს მწვანეთა მოძრაობა – დედამიწის მეგობრების” თავმჯდომარეს, ნინო ჩხობაძეს დაუკავშირდა იმის გასარკვევად, რამდენად საფრთხისშემცველი შეიძლება იყოს ეს საქართველოს ზღვისპირა კურორტული ზონებისთვის.
როგორც ნინო ჩხობაძემ განმარტა, დინება სამხრეთიდან-ჩრდილოეთისკენ მიდის, შესაბამისად, ჯერ-ჯერობით, საქართველოს სანაპიროებს დაბინძურების მხრივ, საფრთხე არ ემუქრებათ.
მისივე თქმით, კვლავ მიმდინარეობს ინტენსიური დაკვირვება.
“ეს ფაქტი საქართველოს სანაპირო ზოლებისთვის არ არის საფრთხისშემცველი, იმიტომ, რომ ის რაც დაბინძურდა, დაბინძურდა აფხაზეთის სანაპიროზე. ისიც ძალიან ცოტათი. დანარჩენი სანაპირო არ არის პრობლემატური ჩვენთვის. ახლა უკვე დინება მიდის სამხრეთიდან ჩრდილოეთისკენ და შესასაბამისად, ჩვენი სანაპირო გადარჩა. ნაკლებად სავარაუდოა, რომ ჩვენს მხარეს გავრცელდეს. იქ, სადაც ჩვენ გვაქვს კურორტები, მაგალითად: – ბათუმი, ფოთი, ურეკი, ესენი ჯერ-ჯერობით კარგ მდგომარეობაში არიან. მიმდინარეობს სანაპირო ზოლების ინტენსიური დაკვირვება.” – განაცხადა ნინ0 ჩხობაძემ.