დღეს საპროტესტო აქციების დროს დაკავებული 11 პირის სასამართლო პროცესი მიმდინარეობს.
პროცესზე, იკითხებოდა განსაკუთრებულ დავალებათა დეპარტამენტის თანამშრომელი ნუგზარ მირიანაშვილი, რომელმაც სასამართლო სხდომაზე განაცხადა, რომ ვერც დაადასტურებს და ვერც უარყოფს, რომ მათ მიერ ნასროლი პიროტექნიკა მოხვდა.
მისივე თქმით, არცერთი ბრალდებულის მიმართ არ აქვს პრეტენზია, რადგან მან ვერ დაინახა, ესროლა თუ არა 11 პირიდან რომელიმემ პიროტექნიკა.
„30 ნოემბერს მივედით და „ქორთიარდ მერიოტთან” განვლაგდით. ჩავიცვით სპეცაღჭურვილობა, ე.წ. რობოკოპი. 11 საათის შემდეგ აქცია იღებს ძალადობრივ ხასიათს, ჩანდა როგორ ისროდნენ პიროტექნიკას პარლამენტისკენ. დრონებითაც ვუყურებდით და ვნახულობდით როგორ ვითარდებოდა სიტუაცია.
გადაადგილებას ვიწყებთ წესრიგის აღდგენისთვის რუსთაველის მიმართულებით. 9 აპრილის კვეთაზე დაგვხვდა ბარიკადები, სხვადასხვა ნივთებით იყო ჩახერგილი გზა. დავიწყეთ გასუფთავება, იყო ჩვენი მიმართულებით სხვადასხვა საგნების სროლა, შეურაცხყოფა, პიროტექნიკის სროლა.
გავწმინდეთ ტერიტორია ბარიკადებისგან, განვაგრძეთ გზა, მომიტინგეები უკან იხევდნენ. უკან მოგვყვებოდა ჭავლის მანქანა და ე.წ. გაფრთხილების მანქანა. პირველ სკოლის მერე, დაახლოებით „თბილისი მერიოტთან” გავჩერდით, გრძელდებოდა ჩვენი მიმართულებით საგნების სროლა, შეურაცხყოფა.
ჩვენი რამდენიმე თანამშრომელი დაშავდა და მომიწია ჩანაცვლება [წინა ხაზში]. დაიწყო შემდეგ ინტენსიური სროლა. ფარი ზემოთ ამეწია თუ ქვემოთ, ვეღარ ვხვდებოდით.
მომხვდა პიროტექნიკა, რომელიც ზედვე აფეთქდა. გადამიყვანეს სასწრაფოს მანქანასთან… მე მესამე მანქანას გამაყოლეს, რადგან ჩემზე მეტად დაზიანებული პოლიციელიც მოიყვანეს. ორი კვირა მომიწია რეაბილიტაცია.
არცერთი ბრალდებულის მიმართ არანაირი პრეტენზია არ გამაჩნია, ვერ დავადასტურებ და ვერც უარვყოფ, რომ მათი ნასროლი მომხვდა. ვერ დავინახე ვინ მესროლა, იყო სიბნელე, იყო ლაზერები, ჩაფხუტიც მეკეთა და მხედველობის არეალი შემცირებული მქონდა”, – განაცხადა გდდ-ს თანამშრომელმა.