გუშინ მიხეილ ყაველაშვილმა გაავრცელა განცხადება, რომლითაც მოუწოდა პატიმრობაში მყოფ პოლიტიკოსებს, მიმართონ მას შეწყალების თხოვნით, დაადასტურონ არჩევნებში მონაწილეობის სურვილი და ის დაუყოვნებლივ გამოსცემს შეწყალების აქტს.
აღნიშნულ განცხადებას გუშინვე გამოეხმაურა „ლელოს“ გენერალური მდივანი, ირაკლი კუპრაძე და თქვა, რომ „ლელოს“ ლიდერები არ აპირებენ ყაველაშვილისთვის მიმართვას.
კუპრაძის თქმით, „ყაველაშვილს მივუთითებთ გზას რუსული ხომალდის მიმართულებით.“
„ლელოს“ გენერალურ მდივანს, თავის მხრივ, გამოეხმაურა ენმ-ის წევრი, ანა წითლიძე.
„გადასარევი პასუხია, მაგრამ ძვირფასო ირაკლი, ზუსტად იმავე ხომალდში, იმავე მიმართულებით იქნებით თქვენც, რუსულ სპეცოპერაციაში მონაწილეობას თუ დათანხმდებით. ბელადომანია თუ სადმე ყოფილა, ნამდვილად, „ლელოში“. ასე, ადამიანები უსიტყვოდ ეთანხმებოდნენ თავმჯდომარეს, რისიც თვითონ არ სჯერათ, ბიძინას გარდა, მეორე, არ ვიცი. კიდევ იმედი მაქვს, რომ გადაიფიქრებენ“, – წერს წითლიძე სოციალურ ქსელში.