“არ მინდა ეჭვიანი ვიყო, მაგრამ მინდა მკაცრად გავაფრთხილო!” – ვისზე საუბრობს თეა წულუკიანი

დღეს, „გახარია საქართველოსთვის“ ლიდერ გიორგი გახარიას საგამოძიებო კომისიაზე დისტანციურად გამოკითხავენ.

ამასთან დაკავშირებით კომისიის თავმჯდომარე თეა წულუკიანი გახარიას აფრთხილებს და ამბობს, რომ  თუკი გახარიას მხრიდან რაიმე ფორმით სხდომა ჩაიშლება, ეს პირდაპირ ჩაითვლება სისხლის სამართლის კოდექსის 349-ე მუხლის დარღვევად.

„ბატონმა გახარიამ თავისი პარტიის „ფეისბუქ“ გვერდზე გამოაქვეყნა „ქარდი“ და თქვა, გამორთვებს არ ვართო. ჩვენ ძალიან გაგვიჭირდა იმ გადაწყვეტილების მიღება, რომ მისი ჩართვის შესახებ თხოვნა დაგვეკმაყოფილებინა. მე პირადად არ მინდა ზედმეტად ეჭვიანი ვიყო, მაგრამ ვფიქრობ, მას მართლაც აქვს განზრახული რომ ჩაერთოს და შემდეგ ეთერი გათიშოს, ამიტომ მე მინდა მას მკაცრად მივმართო და გავაფრთხილო (განსაკუთრებით მის ამფსონებს და გარემოცვას), რომ ჩვენ გვაქვს თმენის ვალდებულება, მაგრამ ამ თმენის ვალდებულებას აქვს თავისი ლიმიტი და ნებისმიერი ქმედება მისი მხრიდან, რომელიც გულისხმობს სხდომის ჩაშლას ამა თუ იმ ფორმით, პირდაპირ ჩაითვლება ჩვენი მხრიდან სისხლის სამართლის კოდექსის 349-ე მუხლის დარღვევად და გადაიგზავნება იქ, სადაც საჭიროა. შემდეგ კომპეტენტური პირები მისცემენ კვალიფიკაციას. ამიტომ, იმედი მაქვს 16:00 საათზე ჩანიშნული სხდომა მშვიდობიანად ჩაივლის,“ – განაცხადა წულუკიანმა.